من الديوان الفائز بالتشجيعية
………….د
نُص كيلو جِبنة رومى
نُص كيلو لِب سوبر
وابعتى صور العيال
خَلّى عبده يخش ثانوى حتى لو بِعتى العِزال
هو إى الفلاح يساوى غير عَلام ابْنُه وأرضُه؟
لسه ليك فى الشِعر برضو؟
لو سامعنى خلّى بالك من مكانى
يابنى انت مرايتى إللى بشوفنى فيها
إللى يِتْلَفْ ابنُه.. يتهد فى ثوانى
واللى يِتْلَفْ.. ابنُه يتهد فى ثوانى
ــ يومها ليه ماسمعتنيش ومشيت بسرعة؟
يعنى كان لازم تسيب فى القلب زَعْلَة؟
ــ يا أم عبده غصب عنّى
الجنيه كان صوته أعلى
خدت بالى من صدى الصوت فى المُكالمة
انتى شكْلِك قاعدة فى أوضْة الخزين
لسه فاضل قد إيه من قمح بكرة؟
لسه برميل الدقيق فاضى وحزين؟
ــ يومها ليه ماسمعتنيش ومشيت بسرعة؟
كل مرّة كنت بتقولّى هسافر
تتحرق لَمبة من اللمبات فى بيتنا!
أعمل ايه لو يوم قالولى وانت غايب
«يمَّه فيه فى الأوضة فار»
ــ يا أم عبده غصب عنى
يومها ماسمعتش لصوتِك فى الحقيقة
بس يومها لمحت صورتِك ع الدولار
واد يا عبده..
البلد أخبارها إيه طمِّنّى عنْها
ــ يابا بَعدَك الحاجات وقفت مكانها
هى بس الأجزخانة فيها أزمة
ما انت كان لك كِيف فى فوّار الحموضة
زى ما تقول انت كنت شِريك بنسبة
آه صحيح ونسيت اقولك بالمناسبة
لسه بمسح وِشّى فى الجلاليب بتاعتَك
كنت بستهبل وأقول الفوطة ضايعة
كنت بمسح غلطى وذنوبى فى عبايتك..
امتى بس هروح اجيبك م المطار؟
يابا فى غيابَك بَشمَّر إيد قَميصى
والعيال اصحابى تِتَّريَق عليّا
وانت مين غِيرَك هيربُطلى الزُرار؟
طب هقولَّك..
الحُمار اللى انت كنت بتركَبُه
عُمْرُه ما فى يوم اشتكى لحظةْ وجودَك
بس لما مشيت يا أبويا
اتقطم ضهر الحُمار.
رابط دائم: