زحمة وكراسى
وأرض واسعة ضيقة
مراجيح بتحدف
نن عينى مبحلقه
أراجوز بيرقص
جوه شاشة مزوقة
والحاوى طبعه
سرقة العين والعقول
يخدك بعيد ويرجعك
وانت الفضول هيجننك
إياك تخون من أمنك
على فكة العمر اللى تاه
جوه شوارع الحياة
اقرأ رسايل هدهدك
وإياك شيطانك يبعدك
وانطقها حق
احفر بروحك ميت مدق
على سكة الصح اللى شق
ريق الزمان
نشن على خوف الجبان
أما اللى خان
اديله طلقه بين عنيه
تكسب دهب
اطلع به على سوق العجب
واعلن مزاد
واياك تبيع
احسن يقولوا عليك وضيع
ساوم عليه
بالفرح يمكن تلتقيه
فتعيش بقا
برا حدود الدقدقه
فات اللى فات
الحلم غرقان إمدادات
يحدف ساعات أفراح ورق
وسواعى روحك تنسرق
تقوم على حالة قلق
بتفسرك تفسير كتير
فتقول الخير
بأصحاب العقل الكبير
فكرك أسير
محتاج لفدية تحرره
اسعى لربك كبره
واطلب مدد
يمكن تنول
وتكون الرسول
تلقى فى دنياك القبول
وتقطع الأحبال تقوم
لم العرايس فى الهدوم
اقلع قناع الأرجوزات
لم البنادق من سكات
وادفن رصاص الاحساسات
جوه الزمن
وإياك تساوم ع التمن
تلقى الطريق
ايمان مصحبك بيناديك
وتبل ريق
الدنيا على مشهد حلال
وزع حلاوة ع العيال
أذن..........وقم
فات اللى فات.......... الجاى أهم
صلى بقى واطلب تجاب
للحق مفتوح ألف باب
رابط دائم: