رئيس مجلس الادارة

عبدالمحسن سلامة

رئيس التحرير

علاء ثابت

رئيس التحرير

علاء ثابت

عاش محروم

محمد زكريا حبيشى

رسمتك ف الخيال وردة

بتفتح حضنها م العصر

وصليت لك بجمع وقصر

لعلى ألقى شىء ناقص

يداوى قلب داب م العصر

وداق الخُسر من غيرك

وعاش العمر كرب وأسر

يدوّر عن قلوب غايبة

ماشافهاش يوم

وشاف كل السنين شايبة

وعاش محروم

من الأحلام ومن صوتها

وضحكتها وخطوتها

ورقتها و م الأوهام

ومين هينام؟

لو أن الصدفة كات طالت

ولا شفتك ولا احترتيش

بعينك لما بصيت لى.. وخطفتنى

قالتلى تعالى ما تخطيش

برجلك غير فـ باب قلبى

يا روح قلبى وما تسيبنيش

أسيبك قولى إنت ازاى!

و شمسك هى نور قلبى

ولا كنتش فـ يوم نسّاى

شفايفِك سر فـ القهوة

وضحكِك هو صوت الناى

وعمرى الجاى معاك طعمُه متغير

كأنك قطعة م السكر فـ مج الشاى

وما قدرتش أعيش

من قبلك اللحظة

ولا شفتش معاكِ بديل

كأنك نهر م الجنة

كأنك آية فـ الانجيل

«زليخة» جزء من حسنك

وطيبتك قابله للتأويل

ومهما أوصف

ألاقى وصفى ليكِ قليل

ولو دوبت فـ دلال الروح

بتوه فـ الوصف والتحليل

فـ عز الليل

بناجى ربى يسمعنا

ويجمعنا فـ بيت واحد

لعمر طويل

رابط دائم: 
 
 
 
 
 
اضف تعليقك
البريد الالكترونى
 
الاسم
 
عنوان التعليق
 
التعليق