والليل يليل ع الصبايا كتير
جرن الأمانى تطيره الزعابير
والليل يليل ع الصبايا ياناس
قمرين يسافروا لعرف مش وناس
خمسين شاويش هاجمين على البلاليص
كانت تغنى ف زحمة المحاصيل
طلعت تراود ضحكة المشاوير
هاتوا الزغابى من الطريق العتمه
فكوا الزرابى غموا عين الكتمة
البنت بيضه والسنين الطامسة
طبعت تجاعيد الخطوط الراسمة
زندين يعافروا ومليونين نايمين
كتفين يقاوموا الوحل وسط الطين
شطين طراوة ف البحار تايهين
وياسين يسلم رغم عنه خلاص
ماقادرش يكتم غربة الاحساس
يا سنين ضنينة مغربة الوديان
ياعيون بتدى ألف ميت عنوان
عن جرن غلة ف لوعة العصافير
عن فرن هدت حيلة عمره قصير
ف الصبح طالعة الشمس حاميه قويه
شاويه البنات البكر ع الزراعية
شايلين زلعهم يرووا ف الشغالة
منشاله يا سكك العذاب منشالة
واخدانا من ضهر المقاومة العاتي
لليل يواتى يا فقير
رابط دائم: