الهوا ممكن يتخنق ازاى؟
قلت لأصحابى الّلى مش موجودين
وتخيّلت معاهم!
لما يعدى فنَفَس الغشاش
وهو بيحلف
بيتخنق!
أو لما يخرُج من حشاش
كل ما يدى ميعاد يخلفه!
أو لما واحد يقرا
ثلاثية محفوظ وهو بينفخ
من كُتر السرد!
أو
لما اتنين شفايفهم تتواعد
بعدين تتباعد
ساعتها الهوا يصرخ جامد
ااه م البرد..
وبعدين قال لى:
الهوا بيتكتب له عُمر جديد
لما يعدّى على كوبرى قصر النيل
الساعة أربعة الفجر
ولان الهوا مش حِمل الهجر
بيحوّل صاحبُه لنسمة تفوت
قبل امّا يموت!
والإنسان بيته
وإنّ الإنسان لأوهَن البيوت
بالنّسبة للهوا
مش للعنكبوت!
رابط دائم: