خبطت على بيت الفرح وناديت
افتح لى يا صاحب الفرح انا جيت
مفرود على طول النخيل عودى
يا وردة حمرا ونادية فى خدودى
يا عقد فل فوق جبين بنور
يا ترحة توللى والفرح بالدور
كاس الهوى كل الصبايا داقوه
الاانا يا امه لسه ما دقتوش
.......
يا ضى كان فى عيونى أحلى ضى
يا ورد كان فى خدودى ماله زى
انا كنت نايمة احلم ببكرة الجى
نادى منادى الفرح صحى الحى
الا انا يا امه وحدى ما سمعتوش
.......
انا كنت لسه هافتح الشباك
وانده يا صبح العمر ما ابهاك
ردت على مرايتى صح النوم
دا الشمس مالت واحنا اخر اليوم
ازاى يمر العمر مالمحهوش
.......
دقوا طبول الفرح هنونى
انا جيت وفاردة كفوفى حنونى
الحنة معجونة بمية ورد
و كتيرة كات تكفى بنات الارض
حنوا البنات ازاى وسابونى
.......
ياللى بتحصوا ايامى وسنينى
حاسبوا على قلبى وما تعدوش
دا القطر عدى بسرعة ما لحقتوش
سابنى فى رصيف الوحدة والتوهة
الكل داس على قلبى ولا شافهوش
.......
يا مرايا عامية وعاملة شايفانى
فين طرحتى التللى وفستانى
انا هاكسرك لو تكدبى مرة
و هاجمعك بس اكدبى تانى
رابط دائم: