اضطرابات

(1)

ما تسأليش البحار عنى ..

و ح أرسى فين ..؟!..

و الشط أقرب ما يكون ..

وأغلب الظن ممكن أكون

ماليش فى العوم ..!!..

و ما تسأليش السما لأنى

ما ليش جناحات ..!!..

أنا جنب منك ..

و راسى تحت سابع أرض

و كنت ليك الصبى ..

و صبحت ( راجل مات )

- والموت علينا حق -

بس اللى عذبنى جوة القبر

إنى ف يوم :

لا عرفت أقول لك ولا اتعلمت

.. قولة .. لأ ..!!..


(2)

لو تقدرى تلمى فى إيديك

السبع سموات

و تهربى م الأراضين

عند طرف الكون

كان يبقى فيه احتمال :

تتملكينى .. أو ..

تستبدلينى ..!!..



(3)

و عشان ماليش فى السما

قمر انتمى .. لليلى ..

و لا لى فى الليل سوى

تسويد مواويلى ..

فقلت أحاول

تكون الشمس غنيوتى

طمع ..!!

طموح ..!!

فاتحرق فى الضى قنديلى ..!!.



(4)



البحر خاين ..

واللا موج البحر ..

هو اللى اتخلق خوان ..؟!..

ألوان يا قلب الحبيب

زى الصدف - صوان -

نازل سحاب السما - دمى -

نزيف بارد

يا كتر دمع البكا

ع الراحل اللى اتخان ..!!..

طعم الخيانة - وطن -

طعم الدوا منه ..

علقم وبالعينه ..

أصحاب ومتوحدين فى الكل

لكنى

مفرد فى وسط الصحاب

با أسأل ما با ألقاش جواب

- مين اللى حاسس

.. بالخيانة

.. بالوطن

.. بالبحر

.. بالسموات ..؟!..

- مين اللى قال :

إن الوطن درجات ..؟!..

- فوق ..

فوقت نفسى ( أنا )

من حالة التوهان

- فووق ..

فقت التقيت الوطن

جوة الشوارع هان ..

- فوووق ..

لميت سمار البنات

فى حفانى ورميته ..

- فووووق ..

همى الحقيقى أفوق

من حالة الفوقااان ..!!..



(5)

الأم غير الوطن

فى كل شيء

- لكن -

يا دوووب ..

مجرد

تشاااابه بس

فى الأسمااااء ..