جاوب فؤادى

أكتب وقول إن الزمن مش ليك.. وإن انت شايف عما بيطل جوه عنيك

رغم الزحام والكتره من حواليك.. والخلق دايره والعجل بيدور

أكتب وأقول ان السؤال عمَّال.. يطلب جواب العبدوالمأمور

ليه الزعل يا قلبى يا حيران.. هو انت صاحى ولَّا انا المخمور

أمرك ونافد لكن الأحوال.. خلت سؤالى فى الجبل محفور

ليه الزعل والعمر لسه شباب.. ليه العما وانت فى قلب النور

جاوب فؤادى ولسه كان سكران.. خلينى وحدى وفوتنى يا سهران

والزم سريرك والسؤال مش ليك.. دا انت اللى عايش والغضب فى الكاس

قاعد بتعزف والوتر حساس

وانت اللى راجع من زمن ونَّاس.. عمَّال بتخطب فى جموع الناس

وتقول محبه والمحبه سراب.. لما انت عارف لسه ليه محتاس؟!

أكتب وأقول إن انت راجل حى.. وإن التُّرَب متشوقة للضى

بس اللى ماتوا بيسرحوا فى الحى.. بيلموا نور القمر من كل خن وبيت

لو كنت فاكر ولَّا حتى نسيت

لازم هقولك سر هذا الكون

الفكر غايب واللى فاز مجنون

الشعر دايب والشعور بيخون

العز رايح والعزيز متهان

والوحش واخد صورة الإنسان

والخلق تايهة فى سكة الصعاليك

وانت اللى عايش فى زمن مش ليك

شكوة فؤادك منك انت إليك

يا تبيع ضميرك والتمن فى إيديك..

يا تعيش لوحدك والزحام حواليك.