ريحة الخشب فى المسرح القومى
صوت الدعا والهمس فى الكواليس
رغم إنه شغل وعرضنا يومى
رهبة وتوتر وكل يوم كوابيس
واقفة الصبية قصاد مرايتها
فى مرة فيدرا ومرة أنتيجون
كل الروايات هى حكايتها
وقلبها قادر يساع الكون
فاضل على رفع الستار ساعة
ايه العمل والبطلة ناسية الحوار
لكن بطاقة حب وشجاعة
بتتولد مع كل رفعة ستار
بنعيش مع الفن ونسرح
نبكى ساعات وساعات نفرح
شجر الخيال فينا بيطرح
نسكن فى قلب الحدوتة
أما الصبية البنوتة
كبرت مع الفن وصبحت
ملكة وسيدة المسرح
سميحة .. أيوب المسرح
سكة سلامة لقا وفراق
وسوسو دى حلم المشتاق
وسوسو تانية فى أرض نفاق
راكبة السبنسة مع المحبوب
واحكى عن الصبر يا أيوب
هى السند للفتى مهران
والحل فى حيرة السلطان
تيتة رهيبة يا حيوان
والفن دوره يداوى عيوب
واحكى عن الصبر يا أيوب
وقت المعارك كله يكش
ومافيش مكان لنفاق أو غش
سميحة بطلة راس العش
تنتج مدد .. وتخش حروب
واحكى عن الصبر يا أيوب
اسمع لرابعة وقول يا سلام
وشوف كمان فجر الإسلام
وعلى ستار الكعبة كلام
يخلى قلب العاصي يدوب
واحكى عن الصبر يا أيوب
مين ينسي صوتك يا سمارة
يا قمر مايحتاجش أمارة
الفن راح فين يا خسارة؟!
واللى احنا فيه وعد ومكتوب!
يا ملكة فى كل الأحاسيس
في دمشق وف تونس وباريس
تنده عليكى شعوب وقلوب
ويحن لك وطنى وعلمى
ويحن برضه صُحاب تانيين
ريحة الخشب فى المسرح القومى
صوت الدعا والهمس فى الكواليس
رابط دائم: