رئيس مجلس الادارة

عبدالمحسن سلامة

رئيس التحرير

علاء ثابت

رئيس التحرير

علاء ثابت

قصائد قصيرة

ميسرة صلاح الدين

«1»



احكلكوا

عن بحر

مبيحبش الزيادة

احكلكوا

عن أرض بتتحرك

تحت ناس مبتمشيش

احكلكوا

عن ورقه بيضا

فى ايدين

رافضه تتعلم الكتابة

احكلكوا

عن نهايه

مبتدتش

وبداية

ملهاش هدف

احكلكوا

ولا الكلام

درجاته زى البكا

فى عنفوان شدته

بيتقلب تجاعيد



«2»

يمكن تكون أخدت الشمس

لكن قلبى لسه دافى

يمكن تكون أخدت البحر

لكن عقلى لسه غويط

يمكن تكون أخدت السما

لكن جسمى لسه حر

يمكن تكون لسه موجودة

لكن قلبى خلاص مبيقدرش

يشوف أشباح



«3»

القمر مش عاجبنى

انا عايز قمر جديد

البحر مش عاجبنى

انا عايز بحر تانى

بحر مفيش بينا سابق معرفه

مفيش بينا ود ولا مشاعر

ميكونش شاركنى هموم ولا افراح

انا كتبت افراح بالغلط

وانا براجع القصيده

ح اشطبها

كمان الشط والليل

مش متحمل منهم

نظره شفقه

ولا لمسه إحسان

انا عارف انهم مش شايفنى

بس انا شايفهم انا شايفهم

وبكلمهم

وساعات بتجرأ واشتكى

وساعات مش بلاقى كلام

القمر

البحر

الشط

الليل

والسما

انا الحاجه الوحيده

اللى ممكن تطلع م المشهد

لكن انا خايف

انا خايف جدا

ومبطلعش



«4»

الإحساس عاصف

يقدر يحرك القلب

بسهولة

من مكانه

لليمين

والحروف

مش قادرة

تعبر

لازم أكتب

مزيكا

مش عارف

أكتب

وانتى كمان

مبتقريش

مزيكا

مزيكا

فى قصايد

مش بتجيلى

كلام

بتجيلى إيقاع

فى مشاعر

بتجيلى نايات

فى ناس

مش ناس

أنا صولو

وانتى

كمان

صولو

لو ممكن

نتحول لكمانجة

واللحظة

تعلمنا

العزف

رابط دائم: 
 
 
 
 
 
اضف تعليقك
البريد الالكترونى
 
الاسم
 
عنوان التعليق
 
التعليق