رئيس مجلس الادارة

عبدالمحسن سلامة

رئيس التحرير

علاء ثابت

رئيس التحرير

علاء ثابت

يا دنيا لو تجرحى ما تورنيـش الــدم

مسعود شومان;

حبة خشب ع الراكيه

يتقلبوا ع النار

والحبل ع الجرار

يا أم العيون باكيه

حبة خشب م التوت

ومقطوعين من شجره

فى ليله بنت بنوت

فايضه بنور القمره

طالعه تقول للموت

لا للعدم والفنا

دمى سليل الغنا

على جسمى شدوا الوتر

نزل غناهم مطر

غسل البدن والروح

والباقى راح للحفر

يملا بحنانه القلل

ويعدى فوق الشفه

يا مشية الغزالات

كأنهم حكايات

فوق النجيل تتهز

نازل معاها الندى

والعشق لما ابتدى

قال موالين ع الغاب

والغاب غشيم بكاى

شايل آهات الناى

صايد دموع اللى غاب

وغنوة النساى

سكر حنانك داب وَيَا مرارة الشاي

يا دنيا لو تجرحى ماتورنيش الدم

طالع سلالم سلالم

دى سلمه مكسوره

ودى سلمه م الهم

حبة خشب ع الراكيه

يا حسرة الأشجار

بتودع الأوراق

ومن فراق لفراق

رجليها فوق النار

الغصن مال آسيان

باع هزته فى الريح

وبيشترى الأحزان

مكسور ومتدارى ورا كومة الفتافيت

مكسور وأنا الوزان

حبة خشب م الزان

يتقلبوا ع النار

كان عندى طير بيرفرف

ينقش بصوته الدار

يا دكة الفقرا فايت عليكى التراب

بكاى يا خشب الباب

مشتاق لحبة ونس

لكفوف تدق عليك

لربابه صوتها وحيد

بتجرب الأوتار

حبة خشب ع الراكيه

يتقلبوا ع النار

والحبل ع الجرار.

رابط دائم: 
 
 
 
 
 
اضف تعليقك
البريد الالكترونى
 
الاسم
 
عنوان التعليق
 
التعليق