أنا كنت حاضن عودي
وانا شايله
قاصد مقام الحب وعمايله
اللحن وانا قايله...
فى حلقى دموع
وف دمى معنى الورد ورسايله.
دم الشباب اللى انسفح حُباً
خلانى أرجع فى الغرام شاباً
وعفقت عودى عفقة الموجوع
بادعى على محبوبى وباحايله
والدمع فى مسايله
يعيد القول
ويرجّع المرجوع :
يا عشق صابح ع الرصيف بيضوع
يا دم ريحته الورد
فى خمايله.
الدم له جمايله على الحلوين
الورد لولا الدم كان ياسمين
الحب طبعه كده
ناس مندورين للفدا
وصبايا يتمايلوا.
حضنت عودى ضنا
وضربت أوتاره
زى اللى طالب من حبيب تاره
ييجى يقول يا نيل
يقول يا جميل
عايز يقول ظالم يقول يا أنا
هو الوطن ياجميل بنختاره ؟
الحب طبعه كده
ناس مندوهين...والندا
من ناى رقص له النخل بجدايله.
حبيبى واعدنى وماجاش
فى المعاد
أجمل ما فينا مخلوقين للردى
أجمل ما فينا اتواعدوا
تحت الأرض
زى الجدور الخضر.. واتقابلوا
زى البدور الخضر
يطولوك يا ليل...لآخر مدى
على الحسين..للفجر..والسيدة
هُمَّه مهور القاهرة الخضر
وشموعها الخضر
جرجرت عودى
ع البلاط والندى
فى كيسُه محمي
بس عرقان شجن
وعينيا مش شايفة
عينيا شايلة كل دمع الزمن
ع القهوة مرمى بعودي
عطشان لهم
وكل شيء موجود
إلا المهورالخضر..
وَنَس الوجود
وصهبجية السهر والغنا
شوية..
كانوا بيخرجوا من العود
بيؤمروا الأوتار تقول وتجود
وانا مرمى جنب العود
من السلطنة:
أنا وحبيبى فى الغرام
مفيش كده
دا غرام قديم ما يزول
وف كل جيل دمى الجميل بيقول:
الحنة يا قطر الندى
الحنة
الحنة الحنة
يا قطر الندى.
رابط دائم: