مطَر.. وعصفور ارتعش
وبين إيديكى الطيبة طلب الأمان
أيوه باحبك, وباحبك من زمان
وكل ما بترُخّ باشتاق لك كمان
وبرَّه إيديكى إحساس الخطر
***
خبَّطت بجناحى على الشبَّاك
علامِة قلْب فى قزازِك نَقَش
ورسمِة وردة فى الشبّاك حَفَر
وكتبت بالمَيّة: خُدِينى من الهلاك
ونشِّفى بشعرك جناحى من المطر
***
لسه المطر بيرُخّ جامد ما انتهاش
والبرق بيطَلَّع لى م السحابات لسان
بس انتى..
يا للى انتى الدفا.. وانتى الحنان..
فتحتى للعصفور بيبان العش خَش
حَسّ الشمس فى إيديكى انتعش
وبص فى عينيكى لقى الزُرقة اندهش
ووَشَمْتى ريشى بكحكتين شمس وقمر
وبرَّه قزازِك العالم مطر.
رابط دائم: