يا مصر نيل ونخيل وأومباشي
لسّه الأماكن ثايرة وبعودة
يا قتيل بإيد المفترى الفاشي
مين اللى ساوَى الوَحْش بالدّودة
مين اللى ربَّى ومين ما ربّاشي
مين اللى سدّ ف سكّة مسدودة
مين اللى باعنا لمين ما يسواشي
واندار عشان يقتل فرج فودة
اثبت مكان موتك يا نقراشي
واكتب بدمك مصر موجودةه
..................
الدم بالدم والنار تتكوى بالنار
اكتب تاريخك وطن
واكتب تاريخنا نهار
لسه السلاح ع الكتاف
وقلوبنا سيف وعيار
يا مصر روحى النهاردة بترسمك شارع
عمّال يعدد ويبكى عليك يا خازندار
..............
الوقت مش وقت اختلاف وخلاف
الوقت وقت الحق والانصاف
فاضرب يا نسر وكلّنا ويّاك
اضرب وقول المصرى مش خوّاف
...............
اضرب يا نسر وكلّنا ويّاك
واطلع وهاجم كافة الأوْكَار
مصر البهية وشعبها فى حماك
...... اضرب وقلبك ع الكفوف إشعار
نارك تِطَفى قلوب بتترجاك
...... تضرب بعزم ما فيك عشان التار
اضرب يا نسر وكلّنا ويّاك
....... الشعب خلفك زلزلة وإعصار
الكل واحد والسما مساعداك
فاضرب بعزّة منتقم جبّار
.........
يا طياراتنا اتحركى للدمّ
واسقى اللى ماتوا الرحمة م الشرايين
الهم يكتر أو يزول الهمّ
واقفين وشايلين روحنا ع الكفّين
متكفّنين بالعشق جنب اليمّ
ومصممين رغم إننا مسالمين
كافر ومزقوق من ولاد العمّ
خاين وخدّام عند ناس خاينين
راحوا الغلابة يجيبوا مصر وجُم
متعصبين بالمسكنة وساكتين
واقفين وشايلين روحنا طفل وأم
وهنحمى مصر لحد يوم الدين
يا طياراتنا اتحركى للدمّ
واسقى اللى ماتوا الرحمة م الشرايين
........
اضرب يا نسر.. الحق عايز ناس
اضرب وصوّب ضربتك للرأس
اضرب وكفّك طوب غضب ورصاص
وعنيك شرار وعيار وليل ونّاس
اضرب ومكّن عودك الفارع
واخسف بضربك قلعة الأنجاس
اضرب بإيد الثورة والشارع
اضرب بحقّ السجدة والقُدّاس
اضرب وزندك ع السلاح بارع
والقلب أجمد من زئير الفأس
........
يا طياراتنا الحق م الغدّار
والضرب يبقى بجد مش بهزار
ضرب اللى ركّز ضربته ف سينا
ضرب اللى مات علشان يعلّينا
ضرب اللى خطّى بطول خطاوينا
سور المدينة ومكّن الطيّار
.............
يا طياراتنا الحق م الخاين
الدمّ مصرى ودمّى مش هاين
الدمّ دمّ اللى انحنوا لله
دمّ اللى عاشوا الحلم من برّاه
دم اللى دينه تملّى ماشى معاه
دمّ اللى هيجيب حقّه م الدّاين
..............
اضرب يا نسر الضرب بيقوى
اضرب وساوى ف صفّنا وسوّي
واتقوّى بينا وبصّ ف عنينا
وشّ الشهيد فى الجنّة بيضوّي
........
اضرب وقول المصرى مش خوّاف
المصرى قادر ع الحياة لو حاف
قادر فى عزّ البرد يبقى لحاف
قادر يصير الضلمة والكشّاف
اضرب يا نسر وكلّنا ف ضهرك
اضرب وسيفك شعبها ومُهرك
اضرب وفرّج للى عمره ما شاف
الوقت مش وقت اختلاف وخلاف
الوقت وقت الحق والانصاف
فاضرب يا نسر وكلّنا ويّاك
اضرب وقول المصرى مش خوّاف
............
> شعر : سعيد شحاتة