يا السهاد اللى ف عيونك

مش ح اقولك نامي ننا

ولا اغنيلك ف ننك..

سافرى فيكى

وارحلى شبرين ف طينك

انسى مره أنى ابقى فارس

وانسى برضه إنك صبيه

اخبطينى فوق دماغى

وهزى فيا

خللى أوراقى تقع على

رتم واحد

يمكن اعرف مين خضارك

ولا مين الدود ف أرضك!!!

حاورت ناسك ف المناسك

قلت له : ما انا اخويا ماسك

ف التراب

وعروق ولادى شابكه ف جدورها

الأيادي

وأمى لابسه من أزلها طميها

لافاه كشالها

والجميع لجبينها طاطى..

قاللى: وانت

قلت له : ده كفايه

قاللى: لأ

أصل الحب فيكى يا أصيله

فرض عين على كل ناسك...

شطى يمك

يمى شطك

مش ح تفرق..

أصل لما يوميها سال

الدم فوقك

شفتُه سابنى

وراح لحدك

وانتظرته يجينى تانى

لما حدِك

واما طالت غيبته

قربت التقيته

قاد ضلوعى

زى عود كبريت

وشطِك....

قالوا:كاره

قلت: حابب

قالوا: كاره

قلت: حابب

قالوا: طب فين الأماره؟

قلت : ما وصلشى إلا أنا..

قالوا: فسّر

قلت : اخيّر

إنت بين حاجتين وبس

يا تحبها لغاية ما تكره

يا ح تكتفى بإنك

تعظم ف النشيد.. !!