مفرود ف نعشي
ولا مش مفرود
القصد
فى التشريفة موكب دود
بصيت بعينى الميِّتة
لحظة صراخ الميتين
أمى وأبويا
فوق رغاوى الدم
أنا مين؟
ومين شايل كتاف الهم؟
مفرود ف نعشي
بنت بيضا هناك
ينطق بياض الجسم من تحت العباية
وأنا قلبى ميِّت
قلبى مَصفاية
قلبى ملان بالضحكة/ بالنسوان
كسلان أخش التربة
قلبى جعان
مديت ايديَّا الميِّتة... مديت
ولمست آخر لمسة تعويذة
كانت لذيذة
والبنات تبكي
تبكى وتغمز
بس أنا اتغديت
لمِّيت ايديا الميتين ف النعش
وشى انكشف عن ضحكتى الخضره
ناديت
ناديت
يا صاحب الحضره
ردت عليَّا بنت بملاية
ردت
ولكن كنت أنا اتوفِّيت
رابط دائم: