رئيس مجلس الادارة

عبدالمحسن سلامة

رئيس التحرير

علاء ثابت

رئيس التحرير

علاء ثابت

اتعكزى

إبراهيم زويتة

اتعكزى

على كتفى وإصحى وركزي

إوعاكى جوه اليأس يوم

تتبروزى اتحفزي

واتحيزى للحق فوقى وميزي

بين إللى صاينك وإللى خان

مين إللى حر ومين جبان

احضنى وجع الغلابة

موتى سنين الكآبة بغنوة مليانة حنان

امسحى عرق الجبين للشقيانين

ابدرى تانى الأمل فى الفلاحين

المغروسين فى قلب الغيطان

زى العيدان حنتها طين

الحلم ليه دبلان وناشف

ضحكته مخاصمة الشفايف

والوجع طارح وسارح

فى الشوارع والوشوش

اروى اللى مات م الحلم تاني

يصبح مزهر بالأماني

خلى الجراح ماتموتوش

افرشى ع الأرض ضلك

ما تصدقيش إللى يقولك

إن بكره أرض بور

أرض بكره بكر لسه

تطرح الحب إللى لسه

جى يحكى ألف قصة

عن عنيكى يا صبية

جايب المهر بدمه

لأجل تتحنى ضفايرك

زى شمس المغربية

اغزلى خيوطها نهار

الأمل منك يفوح

ويا ريحة البخور

تدعى دعوة مستجابة

أصلها ساعة إجابة ربنا يحمى يبارك

لأجل النبى شفيع الغلابة

يجعل نهارك رضا

ينصر ولادك ع العدا

والرزق لقمة تكون حلال

ولا تعرفيش معنى المحال

أيوب صبر صبح نبي

وإنتى اللى صبرك شال جبال

إنتى فى جمال يوسف

وطهارة العذرا

رابط دائم: 
 
 
 
 
 
اضف تعليقك
البريد الالكترونى
 
الاسم
 
عنوان التعليق
 
التعليق