شَالك مِتْزَهَّر وبيضحك على كتفك
وعصايتك شبه البنى آدمين
صالب عودك قُدَّام رِيح الدنى
ورغم حُمُولك عمرى ما شوفتك مرة حزين
بتبدّل وجعك «بالضحكات» اللى انت زارعها
فـ غيط القمح
وبتاخد بالباقى من الدنيا «طِحِين»
كنت زمان بتعافر
ويا المِحرات و«البَتَّانَة»
واما الضُهر يأدِّن تقعد
تتغدى معانا
جبنة قديمة و«بَتَّاوتين»
لُقمة هنية تشبَّع كل الدنيا محبة
وبتاخد تعبك تحت دراعك وتقيّل حبة
للحُب تَقَاوِى بتطرح أحباب
والسر النية
و«الرزق يحب الخفية»
وساعات..... من غير اسباب
الخُص يدارى حنينك ف الراديو
وصوت «الست»
وسؤالها المحتاج لجواب
هو صحيح الهوى غلاّب؟
تسهر فى جفونك عين الليل
وبيسهر وياك «أبو زيد ودياب»
طول عمرك ساند أرواحنا بإيدك
وبتعمل لاصغر عيِّل فينا حساب
وبتاخد إيد أحلامنا المكسورة
وتوصلها لحد الباب
عمرك ما مشيت فى «السَاقَة»
ولا سَاقك ضَعْفَك فـ حياتك
ولا حَبْلَك كان مَرخِى أو اتساب
بتقول الحق على رقبتك
وما كُنتش حتى فـ أصعب يوم كداب
صبرك وسكوتك «حَصَّالة»
وغطانك تطرح رجالة
حتى سنابل قمحك
والدُرَة ب شناب
زنهار....... مش ريش
دايما حافظ وقفة جِدَّك
اما طلع له الدِيب ما جريش
الرجالة بتوزن ماس على روس الناس
والندل «دِشِيش»
بتصُر الأيام الحلوة فـ منديلك
و«تعبِّي» الأيام الصعبة فـ «قَعْر» الخيش
وتمَجِّد «ناصر»
وبتكره تل أبيب
واما نجيبلك سيرة النكسة تعيط
وترُوح..... ما تجِيش
وتشِب على رجولتك وتحمَّر عينك للدنيا
لما بتيجى سيرة الجيش
بِتغِير على مصر
وتاكل قلب اللى بيجرحها بكلمة
وتاخدها فـ حضنك
تسجد سجدة طويلة لرب الكون
وتقوم....... درويش
رابط دائم: