أنا عايزة فرصة عيلة
ترجع ف كلمتها
ولما تقف ف زورها
تبّلع بالضحكة
وتقطم من تكشيرتى حتة تشّبعها
قطمة ورا قطمة
ننام من كتر اللعب
أنا عايزة فرصة
مدردحة حبتين
تقدر تفض خجلى وبراءته
وتحل شعرى
تاخد من حضنى الهم اللى مرابط على كتفى
وبكرباجين ف الهوا
يتفك ديل الحصان
............
انا عايزة فرصة بنت حلال
ماشية كده دوغري
لا تروح يمين ولا شمال
راضية معايا بقسمتى
ولما تحب تفاجئنى
تفك أول عروة ف قميصى
وتجيب لى كف حنين
يقدر يلقف الشهقة
............
أنا عايزة فرصة رغاية
تونس وحدتى
تاخد وتدى ف الحوار
وتوافقنى الرأى ف الآخر
وبمجرد ما تتنازل
احبسها ف أوراقى
تبات ونبات
وكل ما تفلفس
يترطرط اسمى ف المكتبات
انا عايزة فرصه بس تكون بتاعتى
مش بتاعة حد
خدها جربها تحت بير السلم ف حارة ضلمة
ولما اتوسلت يسيبها
عرف أنها سكنت مراية صحبه من قبليه
ورغم أنه كسرها
فضلت مخلصة له
............
انا عايزة فرصة حية
فيها الروح
تحب الغروب وماتّروحش معاه
تتلون بقوس الشمس
وتتفداه
ماينغرسش ف قلبها
تصبح يتيمة
اخت القمر وحده
فرصة لم يخلق سواها الله
رابط دائم: