أجابت الفنانة القديرة ميمي جمال على سؤال الإعلامية لميس الحديدي الذي وجهته لها: "إزاي قدرتي تبعدي عن الفن رغم كل هذا الحب له؟".
موضوعات مقترحة
وقالت: "أنا بعدت عن الفن مرتين ومكنش اعتزال وقتها مرة عندما مرضت والدتي وأصيبت بالزهايمر وكانت لاتستطيع أن تخدم نفسها.. في الوقت ده ضاع مني شغل كتير بس كان برضا مني عشان أخدم والدتي، فعلى سبيل المثال زي مسلسل "راجل وست ستات" كنت المفروض هقوم بدور الأم مكان الراحلة الفنانة زيزي مصطفى، وبالفعل وقتها اتفقت على الدور وأخدت العربون لكن لما رجعت البيت كانت أمي قاعدة فجأة قالت لي وانا قاعدة معاها: أمال فين ميمي؟ رديت عليها وقلت: ميمي جاية في الطريق؟ قالت أمي: طيب لو سمحتي لما تيجي قولي لي عشان أصحى.. هذا المشهد دفعني للاعتذار وأيقنت وقتها أن ماينفعش أسيبها لوحدها في البيت فاعتذرت عن العمل ورجعت العربون.. لأن ماينفعش أجيب حد ياخد باله من أمي".
تابعت قي لقاء خلال برنامج "كلمة أخيرة" الذي تقدمه الإعلامية لميس الحديدي على شاشة "ON" قائلة: "المرة الثانية تركت الفن بعد رحيل زوجي الحاج حسن اللي لسه بتأثر برحيله لحد دلوقتي لأن جوزي الوحيد الي عشت معاه من سنة 1966 وخلفت منه بنتين".
وكشفت في لقائها أنها لم نتجب في بداية زواجها لمدة عام ونصف برغبتها خشية عدم تمكنها من الطلاق لإيمانها أنه إذا أنجبت فعليها أن تبقى مع زوجها لأنه سيكون المسئول عن تسليم بناتها لأزواجهم قائلة: "لما اتطمنت أنه رجل طيب وحنين وعطوف وكل الصفات الحلوة فيه قررت الإنجاب وجبت بنتين نورا ونجلا".
استطردت: "لما الراجل ده اللي عشت معاه العمر ده كله يمرض أسيبه وأنزل أمثل لا طبعاً ؟ قعدت بجواره في المستشفى هو في غرفة الرعاية المركزة أخدت أوضه بجواره ورفضت إني أقعد في البيت واجي في معاد الزيارة ومكثت معه 28 يوما تحت رجليه"، كاشفة أن آخر شيء أخبرها به الفنان الراحل قبيل وفاته أثناء مكثها معه في المستشفى، قال عندما نظر إليها ووجدها تضع يدها على خدها فقال لي: "ياميمي نزلي إيديكي من على خدك إبقي حطيها بعدين قلت له: ليه بتقول كده؟ فرد: وقال لي بلاش ده.. وطلب مني شرب الماء جبتله الميه وشرب وحط دماغه ومات وأنا سقيته آخر بق ميه في حياته".
واصلت: "بعد كل العمر ده ولأننا كنا متفقين على إنجاح هذه الزيجة حتى لو اتخانقنا".
وكشفت أنه في بداية زواجها اختلفت معه ووصل الأمر إلى الطلاق بسبب غيرته علي لرفضه إرتدائي السواريه "المكشوف" على المسرح ووعدته بعدم فعل ذلك، وعندما شاهدني أرتدي السوارية مجدداً غضب والقى يمين الطلاق قائلة: "ألقى يمين الطلاق بالبق كده وعندما حل المساء وكنت فاكرة أنه كلام في وقت غضب قال لي لا إنتي دلوقتي محرمة علي زي أمي وأختي.. ومن وقتها سمعت الكلام وبقيت بحط "شال" على أي فستان سواريه بلبسه على المسرح".