"كارو" هي الابنة الكبرى والمضطهدة دائمًا من "أبلة فاهيتا"، بعكس أخيها "بودّي" المدلل باعتباره الولد طبعًا.. طفلة لم يكتمل عمرها السبع سنوات ومع ذلك بتقوم بمجهود جبار مع والدتها، كل التحضيرات والمواعيد حتى التذاكر لو نقصت واحدة تبقى "كارو" المسئولة، طبعًا هي كطفلة معندهاش رفاهية الاختيار والابتعاد عن سلطة الأبلة، لازم تنفذ الأوامر وإلا....
موضوعات مقترحة
ولأن "كارو" طفلة غير عادية، عندها قدرات أكبر من سنها "فصاحة لسان، مساعدة ذكية، سند وظهر لمامتها"، الأبلة مقدرتش تستغنى عنها في أولى بطولة درامية لها، ولأول مرة هتكون "كارو" لها بطولات فريدة من نوعها أمام مامتها وهتخطف الأضواء منها.
"كارو" فضفضت واتكلمت من قلبها مع "بوابة الأهرام" عن قهر مامتها لها، وعقد احتكارها معها لمدة ٩٩ سنة، لكنها أكدت أنها هتاخد حقها من مامتها في تجربتها في مسلسل "أبلة فاهيتا: دراما كوين"، وبرغم كل ظلم وتسلط "الأبلة" على بنتها "كارو" إلا أنها اعترفت صراحة أن مفيش أي فنانة بتنافس مامتها إلا اسمين...
الحديث عند "كارو" في السطور الآتية...
- ممكن تكلمينا يا "كارو" عن تجربتك الأولى في التمثيل، وإزاي تدربتي عليها؟
أنا ممثلتش بمزاجي، ما فيش حاجة بعملها بمزاجي، كله بالغصب والإجبار، علشان مامتي أجبرتني على التمثيل والغناء والدوبلاچ ومأخدتش فلوسي منها. بس بالرغم من كدة، في المسلسل أنا أخذت فرصتي وعرفت أخد حقي منها ونجمي لمع وبقيت "نيزك الشرق".
- احنا سمعنا يا "كارو" إنك هتنافسي "الأبلة" وهتغني في المسلسل؟
أيوة أنا غنيت أغنية تعبر عن عذابي اسمها "اي اي آه".. متخيلة يا طنط كم الآلام اللي تخليكي تعملي أغنية اسمها كده؟ هتفهموا لما تشوفوا المسلسل عشان لو قلت أي حاجة زيادة مامتي هتحرمني من البقسماط تاني.
كارو ابنة أبلة فاهيتا
- بنشوف ماما دايمًا شخصية متسلطة، إزاي سمحتلك إنك تكوني شريكتها في أولى بطولتها الدرامية؟
متسلطة دي كلمة قليلة عليها، أنا مش شريكتها في التمثيل وهي أخذتني معها إجبار، وأكثر سبب خلاني موافقة على مسلسل ده، أن أكتر من نص المسلسل احنا مش مع بعض في نفس المشاهد فكنت باخد منها بريك الحمد لله - بس عشان هى المنتجة فكانت بتخصملي برضو على كل مشهد كنت بعيده.
- هل لو اتعرض عليكي يا كارو إنك تقدمي عمل بدون مشاركة ماما هتوافقي؟
أنا نفسي قوي أشتغل مع ناس تانية من غير مامتي علشان أريح منها، بس هي ماضية معايا عقد احتكار 99 سنة بس الحمد الله عدى منهم 6 شهور.. هانت.
- ياترى بعد ما نجوميتك كبرت على ماما في المسلسل.. معاملتها معاكي اتغيرت؟
نجوميتي دي للمشاهد، إنما في البيت أنا طفلة معذبة ومقهورة، دي أخدت فلوسي من نتفليكس وحطتهم وديعة باسمها في البنك.. ربنا على المفتري.
- بتقولي إن ماما أجبرتك على المشاركة، هل كمان ظهور "بودي" أخوكي كان بناء على رغبة منها؟
أكيد طبعًا، كل حاجة لبودي، بودي حبيب ماما.. هي أصلاً عملت المسلسل ده علشان بودي يتشهر.. بس هو مالوش ذنب هو أخويا وباحبه حتى لو هي بتفضله عليا.
كارو ابنة أبلة فاهيتا
- بصراحة ياكارو حبيتي حياة الفن أكثر ولا المدرسة؟
كارو طفل معذب ومعندوش رأي في حاجة.. أنا حتى محرومة من نعمة الشكوى من الدراسة والمذاكرة.. وحتى التابليت بتاع المدرسة مامتي أخدته مني ونزلت عليه تيندر.
- بتشوفي مين من النجوم اللي بينافسوا مامتك؟
مافيش حد بينافس مامتي أصلًا بس لو لازم أقول أسامي هقول طنط نادية الجندي وطنط نعيمة الصغير.