تحدث الفنان أحمد بحر، الشهير بـ«كزبرة»، عن أوجه التشابه بين شخصيته الحقيقية والشخصية التي يقدمها في فيلمه الجديد «محمود التاني»، كاشفًا عن جانب من صراعه النفسي ورغبته المستمرة في تطوير نفسه وإثبات قدراته.
موضوعات مقترحة
كزبرة يكشف أوجه التشابه بينه وبين شخصية محمود
وقال كزبرة خلال استضافته في برنامج «معكم منى الشاذلي»، مع الإعلامية منى الشاذلي، عبر شاشة ON، إن شخصية «محمود» في فيلم «محمود التاني» تشبهه في كونها تمثل الشاب والمواطن البسيط، الذي ينتظر فرصة حقيقية لإثبات نفسه.
وأوضح: «طول الوقت هو مستني فرصة واحدة لأنه عارف إن مفيش فرص كتيرة هتجيله، والفرصة دي لما بتجيله خلاص مش هتيجي تاني، وعشان كده بيعمل أي حاجة عشان يستغلها صح».
كزبرة: عندي صراع مع نفسي وعايز أثبت لنفسي
وتطرق كزبرة إلى اجتهاده وشغفه بالتمثيل، مؤكدًا أنه لا يجيد الحديث كثيرًا عن حجم المجهود الذي يبذله من أجل تطوير نفسه في المهنة.
وقال: «أنا مش بعرف أتكلم عن نفسي قوي، وأقول قد إيه بتعب وبحب المهنة دي قوي، وعندي صراع مع نفسي إني مش عايز أثبت حاجة للناس، لكن عايز أثبت لنفسي».
أحمد بحر: طول الوقت مش راضي عن اللي بعمله
وأضاف كزبرة: «طول الوقت حاسس إني مش راضي عن اللي أنا بعمله، أو معملتش اللي عليا، عشان كده بشتغل أكتر».
واختتم حديثه بالتأكيد على حبه الكبير لمهنة التمثيل، قائلًا: «بحب المهنة دي بجد وبشتغل بكل ما عندي وكل طاقتي فيها، ومع الوقت الناس هتبتدي تفهم قد إيه أنا شخص بتعب، والوقت هيثبت وإن شاء الله خير».