أكد الموسيقار عادل حقي أن أغنية جيتلك بألبوم عمرو دياب الجديد، أصبحت التريند رقم واحد، مكتسحة باقي أغاني الألبوم.
موضوعات مقترحة
وقال الموسيقار والموزع الموسيقي عادل حقي، في تصريحاته لبرنامج لمن يهمه الفن، تقديم أميرة نور على نغم إف إم: «من صغري كنت بغني وأنا عندي ١٦ سنة، واللي خلاني أدخل في التوزيع الموسيقي، إني كنت بحب أعمل تراكات للأغاني من أول وجديد وأسمع كل آلة لوحدها وأفصلها عن صوت المغني، وده اللي حببني في الآلات والتوزيع».
وتابع: «بقالي حوالي ٣٦ سنة بشتغل في المزيكا، استغربت في البداية كلمات أغنية المفضل من ألبوم عمرو دياب الجديد، ولما اشتغلت عليها كتوزيع قولت إنها هتكسر الدينا، ما كنتش متوقع إن اغنية جيتلك هتكتسح كل أغاني الألبوم وتبقى الترند رقم ١ دلوقتي، لكن تستاهل لأن كل حاجة فيها حلوة من أول صوت عمرو دياب لحد اللحن والكلمات».
وعن تأليف الموسيقى، قال: «من صغري وأنا مؤلف موسيقي، والمؤلف الموسيقي شامل أكتر من الموزع الموسيقي، لأنه بيكتب كل الألحان وكل خطوط الآلات، الانهماك في دراسة الموسيقى مابتطلعش حد برا الكلاسيكيات المعتادة، والموهبة بتكمل الدراسة، بتكلم ٦ لغات وده ساعدني في التوزيع والتأليف الموسيقي».
وعن عمرو دياب، قال: «اللي بيجمعني مع الهضبة عمرو دياب نفس طريقة التفكير والشغف اللي بيحركنا، وحب المهنة والموسيقى، عمرو دياب بيجدد نفسه كل مرة، وبيتعامل مع كل ألبوم كأنه أول ألبوم ليه».
وعن انتشار أغنية خطفوني، وأغنية قدام عيونك، قال: «هدف الدعاية وقت أغنية خطفوني هي انتشارها، لكن طلعت أغنية بابا ترند وقتها وعاملة مشاهدة لحد الآن ٣٨٠ مليون على اليوتيوب، ومقدرش أنسى أغنية قدام عيونك للهضبة، لأن ليها حالة خاصة عندي، وكانت أول تعاون مع الهضبة».
وتابع: «ألبوم بناديك تعالى عملت فيه ١١ أغنية، و اتظلم وقتها بسبب الأحداث السياسية وقت نزوله».
وأضاف: «للأسف بقى فيه تدني للمستوى العام والتذوق بين الناس، وبنحاول نحافظ على نفس مستوى شغلنا الشيك، عندنا مشكلة كبيرة جدا في قلة عدد المطربات الموجودين على الساحة الفنية حاليا، لأن مافيش تحديث في طريقة المناهج اللي بتتقدم للطلبة في معهد الموسيقى، ولازم المناهج تتطور لأن فيه تقنيات جديدة للغناء وإحنا لسه واقفين في مكاننا».
وعن الذكاء الاصطناعي، قال: «شايف إن الذكاء الاصطناعي مش هيستمر، وسهل يعمل حاجة تخطف العين أو الودن، لكن ماعندوش رحلة الصناعة ومفيهوش روح، بكره الذكاء الاصطناعي في كل حاجة، وبطلَّع لشات جي بي تي غلطات كتير جدا».
وأكمل: «حلمي إنه يكون عندنا مدرسة متقدمة في الموسيقى، لأن عندنا مواهب كتيرة جدا مش بتبص غير للماضي، وما عندهمش نظرة مستقبلية، أنا بحترم التراث والمنهج القديم بس لازم نتطور
وعن تعاونه مع تامر حسني قال: «عملت لتامر حسني أغنية بنت مين ومتصدرة دلوقتي معظم المنصات، ودي كانت أول أغنية ليا معاه واتعاونت معاه في ٣ أفلام».
وعن حياته الشخصية، قال: «متعتي دايما في وجودي جوا الاستوديو وأنا بشتغل، بحب الطبخ جدا وبحسه زي التوزيع الموسيقي».
واختتم: «بقول للناس ارفضوا الفن المبتذل، سواء أغاني أو مسرحيات وأفلام، ونرجع للمستوى اللي كنا عليه في مصر ونقدم الفن الراقي فقط».