حرص ناصر ماهر لاعب فريق الزمالك السابق على توجيه رسالة شكر، لجمهور الزمالك، عقب إعلان انتقاله رسمياً لصفوف بيراميدز خلال فترة الانتقالات الشتوية الجارية.
موضوعات مقترحة
وكتب ناصر عبر حسابه على موقع "انستجرام :" مش عارف أبدأ منين، لأن في حاجات مش سهلة تتقال، خصوصًا لما تكون بتتكلم لجمهور عظيم زي جماهير الزمالك داخل القارة وخارجها اسمحولي أعبّر عن حبي واحترامي ليكم… والله مش مجرد كلام.
من أول يوم دخلت فيه النادي وأنا حاسس إن المكان ده فيه حاجة تتحب يمكن عشان ده كيان كبير أو عشان لاعبين كبار وشخصيات محترمة بتتحمل أكتر من أي حد أو عشان الجمهور المختلف بأجوائه ودعمه ومتعتُه.. بس في الآخر الكورة ممكن تخليك تسيب مكان انت بتحبه وده جزء من اللعبه، أنا بحبكم جدًا والله.
النهارده آخر يوم ليا في نادي الزمالك، النادي اللي تشرفت إني ألبس التيشيرت التاريخي بتاعه، ودافعت عنه بكل إخلاص وخلتوني نجم بجد، ودايمًا بقول إن ربنا أكرمني بجمهور الزمالك.
يمكن الرحلة خلصت دلوقتي بسبب ظروف النادي الصعبة وأتمنى أكون جزء ولو بسيط في حل الأزمه المالية، وأقدر أساعد النادي لأن الزمالك كبير ويستحق إن الواحد يضحي عشانه وبالنسبة لي، الرحلة لسه فيها فصل تاني… إمتى؟ الله أعلم.
بشكر كل زملائي اللاعبين الرجالة بجد في كل المواقف وبشكر إدارة النادي الزمالك برئاسة الكابتن حسين لبيب،
وبشكر جميع المدربين اللي تدربت معاهم.
شكراً. ك چون ادوارد، شكراً ك. عبد الناصر محمد، شكراً ك احمد سليمان اللي خلاني اكون متواجد داخل نادي الزمالك، وكمان بشكر الأوفياء… جمهور الزمالك العظيم، الداعم الأول للنادي.
آخر حاجة هقولها: أنا دخلت النادي وقلت “أنا بحب الزمالك”، ودلوقتي وأنا ماشي بقول:هفضل أحب الزمالك.