في تصريحات خاصة لـ "بوابة الأهرام"، تحدث الفنان أحمد سعد عن تجربته الأولى كعضو لجنة تحكيم في برنامج اكتشاف المواهب "ذا فويس"، مؤكدا أن مشاركته جاءت من شغفه القديم بفكرة البرنامج، الذي لطالما رآه مساحة حقيقية لاكتشاف الأصوات النقية.
موضوعات مقترحة
وقال سعد: "فكرة ذا فويس بأحبها من زمان، قبل ما أغني أو ألحن. كنت باشتغل مع الأستاذ الكبير صلاح الشرنوبي في اختيار الأصوات، وكنت بسمع وأشوف مين عنده خامة مميزة أو شخصية في صوته، وده علمني إزاي أقيم الصوت، وإيه اللي ممكن يتصلح فيه علشان يطلع أجمل".
وأضاف أن البرنامج يمثل له متعة خاصة قائلا: "التجربة ممتعة جدا، لأنك بتتعامل مع أصوات خامة، وبتحاول توصل بيها لأقصى درجات الجمال".
منافسة بروح طيبة... وسعد: "لعبت دور الشرير في البرنامج"
تحدث أحمد سعد عن أجواء العمل داخل لجنة التحكيم، مشيرا إلى أن روح الزمالة والتقدير بين المدربين جعلت المنافسة أكثر جمالا.
وقال: "الزملاء الموجودين عندهم نفسيات جميلة وطيبة، وده بيخلي الشغل لذيذ. محدش فينا بيحاول يضايق التاني، لأن كلنا عارفين قيمتنا وهدفنا إن البرنامج يطلع بأفضل شكل".
وأضاف مازحا: "أنا لعبت دور الشرير شوية... بحاول أخطف الأصوات من باقي المدربين وأعمل شغب لطيف، لكن في النهاية إحنا بنخدم فكرة المنافسة الشريفة اللي الجمهور بيحب يشوفها".
النقد الصادق ضرورة للفنان
أكد أحمد سعد أن الصراحة في النقد أهم ما يميز علاقته بزملائه من النجوم، قائلا:"أنا عندي أصحاب نجوم كبار جدا، لكن عمري ما بجامل، ولو حاجة مش حلوة بقولها مهما زعلوا. ناس كتير زعلت مني وبعد كده رجعنا أصحاب تاني، لأنهم عرفوا إني بقول الحقيقة مش المجاملة".
وأضاف: "الفنان محتاج يسمع كلمة (لأ) أكتر بكتير من كلمة (آه)، لأن كلمة (آه) الكل بيقولها، لكن اللي يقوله (لأ) بصدق هو اللي بيخاف عليه فعلا".
مصر "ولّادة"... والأصوات العربية في أوج تألقها
عبر أحمد سعد عن إعجابه بمستوى الأصوات المشاركة في الموسم الجديد من "ذا فويس"، موضحاً أن الوطن العربي يزخر بمواهب مبهرة.
وقال: "فيه أصوات من السعودية والإمارات وسوريا والجزائر تحفة بجد، وفيه أصوات أول ما تسمعها ما تعرفش إذا كانت مصرية أو خليجية، وده لأن اللكنات بدأت تختفي شوية".
وأضاف بفخر: "مصر دايما ولادة، وده مش كلام، دي حقيقة. كل فترة بتطلع أصوات جديدة بتدهشني، والفن في مصر عمره ما هيوقف".
واختتم حديثه قائلا: "أنا لما بسمع صوت جديد، ببص على التكنيك والشخصية، لأن النجم مش بس صوت حلو، هو حضور وطريقة تعبير، وده اللي بندور عليه في (ذا فويس)".
حوار الفنان أحمد سعد ل بوابة الأهرام