كان يوم رحيل سيدة المسرح العربي سميحة أيوب يومًا حزينًا علي محبيها وعلي المسرحيين والفنانين.
موضوعات مقترحة
وكان من أكثر من عبروا عن هذا الحزن المخرج الكبير خالد جلال الذي عمل معها وحضر معها أكثر من موقف.
خالد جلال مع الراحلة سميحة ايوبرسالة إلى سميحة أيوب
كتب المخرج خالد جلال علي صفحته الرسمية علي موقع التواصل الإجتماعي فيسبوك، رسالة لسميحة أيوب تحت عنوان " وهي يعني ام كلثوم ماتت ؟".
جاء في رسالته :
"أمي حبيبتي
بعد التحية و السلام
لأول مرة ما الاقيش كلمات تعبر عن مشاعر الفقد اللي حسيت بيها النهارده .. جايز علشان صعب اصدق بعد طول الوقت معاكي ان البطلة مش هاتظهر مرة تانية
وجايز لان الحياة الحقيقية مش زي الفيلم اللي ممكن نشوفه كل يوم و البطلة تظهر في نفس الثانية و نستمتع بابداعها
آخر مرة تمثيل كانت في عيد الشرطة اللي قبل اللي فات و كنتي تعبانة قبلها و اصريت انك تيجي و وافقتي وكنتي زي البدر علي الشاشة و علي المسرح وجه الحصاد الريس كلمك و كلمتيه و طلع علي المسرح و حياكي و قبل جبينك
من تسع سنين كنا ف المغرب و سمعتك بتتكلمي مع القديرة الراحلة ثريا جبران و قلت لك الكلام ده لازم نحتفظ بيه ده ميراث و قلتي تعالي نعمل كده و عملنا سميحة ايوب تروي لخالد جلال سنة ٢٠١٦ وسام عظيم بأفخر بيه لحد النهارده انك بتحكيلي أنا و الناس بتسمع حكاياتك".
خالد جلال مع الراحلة سميحة ايوبلقاء خالد بسميحة أيوب
وتابع خالد جلال في رسالته "في كل رحلة و كل مكان كنتي موجودة وجودك سند و حماية و امان و حنان و حب و طيبة و قوة كل كلمة كنتي بتقوليها خبرة عمر و درس عميق حتي و انتي بتهزري
فكرتك اول مرة شفتيني سنة ١٩٩٦ في روما مع العظيم الراحل سعد الدين وهبة و كنتوا راجعين من المانيا و زرتونا في الاكاديمية المصرية بروما و دخلتي بروفة مسرحيتي و سمعتيني وانا باخرج و قلتي لازم نشوفك لما ترجع مصر و ارجع بسرعة
ولما طلبت صوتك يحكي حكاية دفعة بعد الليل ف حفل تخرجهم و حكيتي فبقت حفلتهم بقيمة الصوت و الضوء من جمال صوتك
لما طلبت منك تظهري علي شاشة افتتاح مهرجان المسرح العربي بالقاهرة و قلتي لضيوف مصر من كل الوطن العربي ( اهلا بيكم في مصر مهد المسرح العربي ) ايه ده يا امي هرم بيتكلم ؟".
خالد جلال مع الراحلة سميحة ايوبلقب سيدة المسرح
وأكمل جلال في رسالته "فاكرة الرئيس حافظ الأسد لما سماكي سيدة المسرح العربي ؟ طب فاكرة الرئيس انور السادات و هو بيقول للرئيس جيسكار ديستان مدام سميحة توچووور كومبليه
طب فاكرة وقفتك مع الست أمينة رزق ف فرنسا و انتوا بتعملوا فيدرا
طب فاكرة و انتي ماسكة المسرح الحديث لما ابتدت حرب اكتوبر و خليتي العبقري محمد نوح و كل الفرقة يعملوا مدد مدد شدي حيلك يا بلد
طيب فاكرة التمثال اللي عملهولك عصام درويش كنتي فرحانة بيه قد ايه؟
امي الحبيبة
كلامي ملخبط مش كده ؟ … معلش ما هو ألف حكاية و حكاية معاكي برضه مش سهل ترتيبها في كلمتين هنا
كنت دايما في لحظات الوداع اللي زي دي باكتب بالفصحي واقول ( الحزن عميق ) و لأول مرة اكتشف اني ممكن احزن اكتر من الجملة دي … ودايما كنت اقول للي رحل ادعيلنا بس معاكي باقولك اتطمني أنا هافضل ادعيلك ليل و نهار ماتخافيش و اخيرا اللي زيك يفضل عايش في القلوب و الأرواح و مرفرف حوالينا علي طول
و اخيرا يا سوسو الجميلة هازعل ليه ؟
وهي يعني ام كلثوم ماتت؟
ماهي عايشة لحد النهارده
تصبحي علي خير
بحبك
ابنك خالد جلال".
خالد جلال مع الراحلة سميحة ايوب
خالد جلال مع الراحلة سميحة ايوب
خالد جلال مع الراحلة سميحة ايوب
خالد جلال مع الراحلة سميحة ايوب
خالد جلال مع الراحلة سميحة ايوب