عبرت الفنانة بدرية طلبة، عن استيائها الشديد من التعليقات المسيئة على السوشيال ميديا التي اتهمتها بقتل زوجها عقب إعلان وفاته، قائلة: "معرفش اللي كتبت تعليق تقول إني قتلت جوزي وسافرت جابت الجرأة دي منين والمحامي حلف مش هيسبها لأن التعليق كان جزما بالقتل وليس سؤالا".
موضوعات مقترحة
وأوضحت بدرية طلبة، خلال حوارها ببرنامج "أسرار"، مع الإعلامية أميرة بدر، المذاع على قناة النهار، أنها قبل وفاته بوقت قليل باركت له لأنه كان معمول له مهرجان باسمه في الإسكندرية، مضيفة: "كنت سيباه كويس وكنت في فرنسا بعمل مسرحية وقبلها طلعت عملت عمرة وهو متابعنا وكان كويس".
وانهارت بدرية طلبة في البكاء قائلة: "ربنا وحده وكيلي وأنا مش بنام وأنا لحد دلوقتي رافضة إنه توفى والناس ظالمة أوي ووحشة أوي، والناس طلقتنا وجوزتنا وبيقولوا سابته وهو عيان ومن الكلام ده خلوني راجعت الكاميرات بتاعت ممكن أكون سيبته تعبان ولقيته زي الفل"، ووجهت حديثها لمنتقديها: "أنتم هتكونوا أحن عليه مني ولو أنا طلقته في بنا عشرة هحزن عليه وبنتي الكبيرة اللي كانت هنا والأحفاد عرفوا من المدرسة وانهاروا".
وتابعت: "إزاي تيجوا على وحدة عايشة معاه أكثر من 30 سنة ويقولوا إني قتلته وأنا ملحقتش أدفنه وده اللي وجعني وقلت لهم صوروا فقالوا لي لا حرام وكنت عايزة أطبطب عليه ومحدش عارف كواليس حياتنا وأنا قررت دلوقتي إني أضايق اللي ضايقوني والناس دي بيضيقوني وجوزي كان عايز يموت وهما أخدوا منه المسرح وكان في مشاكل بينه وبين المكان اللي مأجر المكان وحصل مشاكل فمشى وساب كل حاجة".