Close ad

بيتر ميمي يجيب عن أبرز تساؤلات الجمهور عن "الحشاشين" ويؤكد: "مفيش كتاب اتفق على حسن الصباح"

15-3-2024 | 13:03
بيتر ميمي يجيب عن أبرز تساؤلات الجمهور عن  الحشاشين  ويؤكد  مفيش كتاب اتفق على حسن الصباح  المخرج بيتر ميمي
سارة نعمة الله

تحدث المخرج بيتر ميمي عن مسلسله "الحشاشين" في منشور خاص له عبر صفحته الرسمية على موقع الفيسبوك، رد من خلاله على كل التساؤلات التي طرحها الجمهور بعد التفاعل الكبير معه مع أول أربع حلقات من العمل.

موضوعات مقترحة

وكتب ميمي في منشوره: "طيب كل سنة وأنتم طيبين .. مع إنى مكنتش حابب أتكلم علشان دول كلهم ٤ حلقات!". "مبدأيا المسلسل من وحي التاريخ، وده مكتوب نصًا فى التترات، يعنى مش وثيقة تاريخية لكنه دراما تاريخية، هو المخرج العالمي تارنتينو لما قتل هتلر فى السينما كان حقيقة؟، أو نابليون فى فيلم "ريدلى سكوت" الأخير هل ده نابليون اللى فى كتب التاريخ؟ ديه دراما تاريخية .. حاولنا نعمل خيال لفترة من الفترات لكن فى شكل درامي.. لكن رجعنا فى الديكور والملابس لمراجع كتيرة ونادرة علشان نعمل عالم مشوفنهوش قبل كده و ميكنش شبه أفلام أو مسلسلات عالمية.

هل ده حسن الصباح؟، مفيش كتاب اتفق على حسن الصباح؛ لأن المغول حرقوا القلعة وكتبه وأفكاره والموجود اجتهاد… ماركو بولو أو فلادمير بارتول أو برنارد لويس أو فرهاد دفترى… وكتير جدا.

حسن الصباح كان بيعمل معجزات؟.. لا طبعا!!! وده تباعاً مع الحلقات هيتفهم.

"الحشاشين" مسلسل تاريخي بالعامية المصرية.. الأحداث بين أتراك وفرس .. لما عملوه الأتراك اتكلموا تركي، ولما عملوه الأمريكان اتكلموا إنجليزى .. احنا عاملينه فى مصر، والترجمة موجودة فى كل بلد.. المسلسل بيتعرض فى روسيا وأمريكا؟ وأكتر من بلد كل بلد بلغتها.. هم الڤيكنجز كانوا بيتكلموا إنجليزى؟ ولا ويليام والاس كان بيتكلم اللكنة الأمريكية.

ليه حسن الصباح؟.. حسن الصباح شخصية فذة وغريبة ومستفذة إنك تعرف عنها .. مش لازم يكون رمز للخير علشان يتعمله مسلسل، هتلر وراسبوتين كانوا فى منتهى الشر لكنهم شخصيات فذة غيرت العالم، أو على مستوانا المصرى خط الصعيد أو سفاح إسكندرية.

حاجات صغيرة...

- أم الخليفة رصد كانت نوبية الأصل.
- إسكندرية مدينة فى مصر.. لأن فى مدن كتير باسم إسكندرية حوالين العالم .. لزم التوضيح للترجمة لأن فيه غير مصريين بيتفرجوا على المسلسل.
- مجاعة القاهرة الفاطمية مثبوتة تاريخيًا، لكن تعددت أشكالها حسب المصادر، وهى على فكرة كانت قبل وصول حسن بفترة مش بعيدة بس ديه دراما (من وحي التاريخ).
- ما تسمى بمعجزات حسن الصباح مقصود تتصور بالشكل ده وده هيبان تباعا وخصوصا مشهد الراوي حلقة 8.
- عم ملك شاه اتقتل بوتر القوس لأن ده كان عرف وتقليد.

مين الست اللى بتظهر لحسن الصباح؟ ده فى حلقة ٣٠ بقى لو ربنا أدانا عمر..

كل سنة وأنتم طيبين وسعيد أن المسلسل خلاكم تقرأوا وتسألوا.. وشوية شوية هتفهموا المسلسل.. صحصحوا معانا كده يا شباب خلونا نعمل شكل جديد ..   وتبقى بداية ومع الوقت يتعمل أفضل وأكبر وأحسن من اللى إحنا عاملينه .. ومع الوقت ننافس…

#سنغزو_العالم"

مسلسل "الحشاشين" بطولة كريم عبد العزيز، فتحي عبد الوهاب، نيقولا معوض، ميرنا نور الدين، أحمد عيد، إسلام جمال، محمد رضوان، سامى الشيخ، عمر الشناوى، نور إيهاب، سوزان نجم الدين، ياسر علي ماهر، بسنت أبو باشا وعدد كبير من الفنانين، وضيوف الشرف، وهو من تأليف عبد الرحيم كمال، وإخراج بيتر ميمى، وإنتاج شركة سينرجى.

كلمات البحث
اقرأ أيضًا: