ثقافة وفنون

قبل عرض مسلسلها بساعات.."أبلة فاهيتا" في حوار خاص مع "بوابة الأهرام": "نفذت مشاهد الأكشن بنفسي"| صور

14-3-2021 | 23:54

أبلة فاهيتا

حوار – سارة نعمة الله

نجمة ذو طراز خاص، نجحت في جذب الأنظار لها من أول "غمزة" بعينها في أغنيتها الشهيرة مع الموسيقار حسن الشافعي "مايستهلوشي"، وقدرت بموهبتها الخاصة تنافس كثيرا من الإعلاميين المتواجدين على الساحة، وبالفعل أصبح برنامجها "أبلة فاهيتا من الدوبلكس" أعلى البرامج مشاهدة وتفاعل مع الجمهور على مدار السنوات الماضية.


ومن المنافسة من الإعلاميين إلى الفنانين، تدخل أبلة فاهيتا رحلة نجاح جديدة في حياتها، بعد لما قررت تنافس نجوم الأكشن والدراما الكبار "السقا، نادية الجندي" من خلال مسلسلها "أبلة فاهيتا: دراما كوين"، واحد من الأعمال المنتظرة عرضها بعد ساعات قليلة على شبكة "نتفليكس" العالمية.

"الأبلة" رحلة كفاح كبيرة، سيدة مكافحة، بتشتغل ومعها ولادها، وهيظهروا معها في مغامرة خاصة من نوعها، مليئة بالغموض والأكشن والإثارة، بالإضافة طبعًا للاستعراضات والحس الكوميدي العالي المميز عندها.

ولأن "أبلة فاهيتا" رحلة كفاح ونجاح فريدة، "بوابة الأهرام" التقت بها في حوار خاص كشفت من خلاله عن كواليس تحضيرها لمسلسلها الجديد، ومنافستها مع نجوم الأكشن الكبار، ولماذا اختارت الفنان باسم سمرة تحديدًا ولم تفكر في اختيار أحمد السقا، الأبلة حكت في الحوار عن صعوبات مشاهد الأكشن واستعانتها بمصممين معارك كبار، واعترفت أنها نفذت كل المشاهد بنفسها من غير دوبلير.

تفاصيل كثيرة جدًا هتحكيها الأبلة من قلبها في السطور التالية..

إلى نص الحوار..

- أبلة فاهيتا" ممكن تحكيلنا إزاي جاتلك فكرة تحويل البرنامج إلى مسلسل، هل كنتي بتخططي للفكرة من فترة طويلة ولا العرض جالك مباشرة من شبكة "نتفليكس"؟
أنا أرملة متعددة المواهب.. وبشطارتي المعهودة مش مستنية حد يكتشف مواهبي، أنا بكتشفهم بنفسي وبطلقهم على جمهوري، بعد البرنامج كنت محتاجة أطلع طاقتي التمثيلية في عمل جديد عليا.. وقلت أجرب الدراما.. وإذا كنت في البرنامج بكلم الوطن العربي لكن بالمسلسل أنا بقدم عمل فني للعالم كله.

أنت عارفة أن المسلسل هيتعرض في ١٩٠ بلدا في نفس الوقت، يعني "لاليتا" في سريلانكا هتشوف المسلسل في نفس الوقت مع "لوسيانا" في البرازيل .. ده مترجم لـ ٣٢ لغة.. ده غير أن المسلسل هيخلي جمهوري يشوف جزء جديد من شخصيتي مشفهوش خالص قبل كدة بسبب قعدتي ورا المكتب في برنامجي … أم "سمانتي".. أخيراً هتطلع للنور ويشوفها الجمهور.

أبلة فاهيتا



- يا ترى"أبلة فاهيتا" استعدت إزاي لتجربة دراما الإثارة والغموض "دراما كوين" من حيث اللياقة البدنية ومشاهد الهروب؟
ياه..تعبت جدا.. اتفرجت على كل أفلام چاكي شان وبروس لي ونادية الجندي، وماستخسرتش جيبت حسام عركة وإبراهيم سنجة صممولي المعارك والمطاردات، زي توم كروز وأحمد السقا، وعملت كل المشاهد الخطر من غير دوبلير.

- هل كان عندك تخوف من ظهورك مع بداية حلقات العمل بجريمة مما يتسبب في صدمة لجمهورك، وهل ده نوع من إثارة الجذب للمشاهد علشان يعيش معاكي مغامراتك؟

جمهوري منتظر مني الجديد دايماً، وعلشان كده كان لازم أفاجئه بأحداث غير متوقعة، وبما أن المسلسل ده كله مغامرات وأكشن وإثارة كان لازم دخلتي على المشاهد تبقى مختلفة وفي الدراما كل شيء ممكن.. معروفة.

- تعودنا نشوفك يا نجمة في كامل أناقتك، لكن فكرة المغامرة هنا خلتك تتخلي عن كتير من مظاهر أناقتك وشياكتك، إزاي قدرتي تعملي ده؟
بصي يا سارة.. أنا بشوف الناس بتتوقع إيه واعمل عكسه.. وبعدين أنا دايماً أنيقة وشيك، أنا مش عايزة أحرق الأحداث بقي.. أنا اللي أقدر أقوله إنه Its me بشكل جديد خالص.. الأبلة كما لم تشاهدوها من قبل.. ومش معنى كده إن الموضة مش واخدة حقها في المسلسل.. چاميه.. فلوس الفساتين لوحدها أكلت ٩٠٪ من الميزانية.. ده فستان "إيزيس" لوحده فيه شغل وفصوص بتمن اللي صرفته على "كارو" من ساعة ماتولدت.

أبلة فاهيتا



- لكن ظهورك يا نجمة في عمل بعنوان "دراما كوين" ممكن يخلي جمهورك يقول إنك بتتخلي عن بهجتك، وكمان ممكن يخلي منافسين ليكي يحاولوا ياخدوا مكانك في البهجة؟

أنا أرملة فرفوشة وهفضل طول عمري فرفوشة، بس اسم المسلسل "أبلة فاهيتا: دراما كوين" علشان الدراما دي جزء لا يتجزأ من شخصيتنا، وهو مين فينا مش دراما كوين، كل واحد فينا جواه دراما كوين إحنا بس اللي مابنعترفش، أنا الوحيدة اللي بذكائي وشطارتي حولت الدراما دي لدولارات في حسابي في البنك.. الأرامل والشباب من كوپنهاجن لحد سيدني في إستراليا مستنين يشوفوا درامتنا دي شكلها إيه.

- هل تعتبري مسلسلك بما فيه من تشويق وإثارة بيحطك في منافسة قدام نجمة الجماهير نادية الجندي باعتبارها نجمة الأكشن الأولى في مصر؟
انا أكيد استلهمت من حبيبتي نجمة الجماهير الأكشن الاستعراضي الجاسوسي بتاعها اللي تربينا عليه في التسعينات.. بس أقدر أقولك إن المسلسل شامل كامل متكامل أكتر بكتير من "بونو بونو".. بوليسي اجتماعي استعراضي عائلي ساخن… حاجة كدة زي "ذئاب الجبل" لو اتخلط مع "صغيرة على الحب".

أبلة فاهيتا



- ليه فكرتي في باسم سمرة يكون شريك في أول تجاربك الدرامية ومفكرتيش تختاري نجم أكشن ينافسك زي أحمد السقا؟

أنا مش عايزة حد ينافسني في الأكشن بتاعي، "باسم" حبيبي عامل زي "الأنناسة" بيشوك من بره بس من جوه طري وكمپوت خالص.. وبعدين باسم ممثل قوى وفي نفس الوقت كان ضعيف جدا أمام أنوثتي وجبروتي كمنتجة وأكثر حاجة حبتها في باسم إنه مطيع وبيسمع الكلام.. يا حبيبي كان بيسمع توجيهاتي واقتراحتي كلها بصدر رحب.. وساعات تحت التهديد.

- لكن يا أبلة البطولة الأولى في الدراما دايما أصحابها بيواجهوا النقد والهجوم؛ هل فكرتي في ده قبل الموافقة على المشروع؟

أنا كأرملة مخضرمة عرفت إن مفيش حاجة مافيهاش نقد وهجوم.. وأنا برضك مافيش حاجة صعبة عليا - ماشاء الله عليا - وفي الآخر كلنا بنغلط وكلنا عندنا بلاوي.. فأنا بشوف اللي بينتقدني وبدعبس على غلطاته وبلاويه.. وببعتها له وبديله فرصة.. يا يتراجع في نقده يا أفضحه.

- سمعنا إن أجرك تخطى أجر نجوم كبار بالملايين.. إيه حقيقة الكلام ده؟
إيه السؤال المادي ده.. هو ده اللي يفرق معاكم؟ بدل ما تقولي أخدتي كام يا أبلة.. المفروض تسألني هيكسبوا من وراكي كام يا أبلة.. هيكسبوا منتج عالمي جديد فائق الجودة.. أنت عارفة أنا طول عمري شغلي شغل تصدير يا سارة.

أبلة فاهيتا



- النجمة فاهيتا بتصنف نفسها فنانة استعراضية ولا كوميدية ولا شاملة كاملة؟

أنا أرملة مالتي تالنتت.. وبحب أجرب، أنا مقدمة وجبة درامية دسمة تناسب جميع الأذواق عايز أكشن تلاقي استعراضات تلاقي … كوميدية تلاقي … تراچيدي تلاقي هتطلع من المسلسل بترقص وتعيط ومسخسخ ومقشعر - وعلى رأي النقاد الأجانب.. It's Abla Fahita like you’ve never seen before

إيه أكثر المشاهد واجهتك وكان فيها صعبة في التصوير؟

أنا مفيش حاجة صعبة عليا، يمكن بس مشاعد العياط كنت بحتاج يحطولي جليسرين عشان دموعي مش بتنزل بسهولة، وكمان المشاهد اللي بعد البريك في التصوير كنت بحس نفسي تقيلة وعايزة أنام خصوصاً بعد فتة الشاورما.

- الحلقة الأولى كان فيها استعراض وانتهت برفضها التنازل عن مبادئها والرقص في الكباريه، فهل ده تأكيد على احتفاظك بهوية شخصيتك واعتزازك بكرامتك؟

انا كأرملة معنديش حاجة أخاف عليها غير سمعتي وولادي وجزمتي "اللابوتان" الغالية.

- طبعا التصوير فالدراما مختلف عن البرنامج، كلمينا عن كواليس العمل والتحضير له ومدة التصوير؟

لا الاختلافات كتيرة والاستعدادات مش سهلة... قعدنا نحضر ٦ أشهر وصورنا في شهرين - عملت ريجيم الموز، وعملت تجميل في ركبتي، وكنت بسيب لـ "بودّي" ابني أكله وقت التصوير علشان ضميري ميأنبنيش.

أبلة فاهيتا



- معروف أن الإعلامية بوسي شلبي أحد منافسينك الأقوياء، ليه اختارتي مشاركتها معاكي؟
المثل بيقولك خلي صحابك قريبين وأعدائك أقرب.. وبوسي شلبي طبعا إعلامية ليها وزنها.. بس أقنعتها تبدأ ريچيم.

- معروف عنك تسلطك وسيطرتك على المساحة الأكبر من الظهور، ليه المرة دي قررتي ظهور أولادك معاكي في مساحات أكبر؟
ليه بتقولي كده؟ ده أنا من أول ماطلعت ياحبيبتي و"كارو وبودي" في ديل ماما... وفهميني يعني عايزاني أجيب مين ممثلين محترفين؟، إيه أجيب سمية الخشاب تطلع بنتي ولا أجيب أحمد مالك يطلع طفل رضيع؟

- بنسبة كام كان ليكي تدخلات في كتابة السيناريو، مع ورشة العمل؟
المثل بيقول "ماحك جلدك مثل ظفرك" - غير لو عاملاهم "إكريليك"..عشان كده أنا المنتجة والمؤلفة والنجمة والشو رانر، أنا كأرملة مسيطرة ومنتجة بتفرض احترامها على فريق العمل كله، ده طبعا لو عايزين يقبضوا يعني، وأكثر حاجة حبتها في فريق العمل كله إنهم كلهم كانوا مطيعين وبيسمعوا الكلام، كانوا بيسمعوا توجيهاتي واقتراحتي كلها بصدر رحب وساعات تحت التهديد.

-إيه رأيك في النجوم الصاعدين اللي بدأوا يظهروا على الساحة زي دنيا ماهر "سماح بايعة الورد"، هل مشاركتها معاكي كانت من اختيارك؟
دنيا ماهر حبيبتي أبهرتني بشطارتها.. لدرجة إني خفت إن الكاميرا تحبها أكتر مني - بس نبهت على المخرج يقلل مشاهدها عشان ماتسرقش الأضواء مني.

- إيه اللي هيضيفه ترجمة مسلسلك لأكثر من لغة، وبثه بأكثر من دولة في رصيدك الفني؟
الكوميديا المصرية مش واخدة حقها في العالمية، والنتفليكسة دي موجودة في كل حتة ماعدا المريخ، فقلت بقى دي فرصة أصدر خفة دمنا دي للعالم كله، واعمل من وراها فلوس كمان، المسلسل مترجم لأكثر من ٣٠ لغة في أكثر من ١٩٠ دولة – أنا وصلت إلى الأرچنتين وأيسلندا لڤيتنام والفيليبين...قصة نجاح بدأت من سانت فاطيما للعالمية.

- هل في خطة لإقامة سلسلة مواسم من المسلسل، وهل دراما كوين بداية لأعمال سينمائية كمان؟


مستنية دراما كوين ينزل عشان أجري يعلى ويتدبل وأبدأ المفاوضات على السيزون اللي جاية.

- النجمة فاهيتا بتشوف إزاي تعاونها مع شبكة عالمية بحجم نتفليكس، خصوصا أنها تنتهج نهجا مختلفا في تنفيذ مشروعاتها؟
نتفليكس كانوا عايزين يقدموا محتوى راقي وهادف في الشرق الأوسط فملقوش حد سمعته كويسة في المنطقة زيي فعرضوا علي الفكرة اترددت وروني الفلوس فوافقت على طول، أنا بقولك أنا بعمل دائماً الغير متوقع.. أنا مقدمة محتوى راقي هادف لكل أفراد العائلة العربية والعالمية.

- بعد هذه السنوات من وجود أبلة فاهيتا، بتقييمي تجربتك إزاي اللي بدأت بالنقد والهجوم وصولا إلى المحبة والشعبية الكبيرة؟
دوام الحال من المحال يا سارة، والحياة كلها اپس وداونز- والمشاهد محتاج وقت يخد فكرة ويكون رأي.. والمثل بيقول ما محبة إلا بعد عداوة.

- ما هي توقعاتك لآراء الجماهير بعد استقبالهم لحلقات العمل سواء بالإيجاب أو السلب؟

انا واثقة في نفسي وفي أي حاجة بعملها، وأنا عارفة إن الجمهور بتاعي بيحبني بكل أشكالي والمسلسل أصلا بيحكي قريب من حياتي، فبلاش تشاؤم وبكرة تشوفي الجمهور هيتبسط إزاي.

مواقيت الصلاة

اسعار العملات

درجات الحرارة