رئيس مجلس الادارة

عبدالمحسن سلامة

رئيس التحرير

علاء ثابت

رئيس التحرير

علاء ثابت

يا أبو ضحكة جنان

كل هذا الهدير من حولنا.. تلك الأحداث الجسام التى يصل دويها أسماعنا.. التفاعلات التى لابد وأن تؤثر على سياساتنا.. كم المكائد التى تحاك فى الخفاء والعلن لنا.. ذلك الحقد الدفين المتربص بإنجازاتنا.. كم الخبث الهادف لإحباطنا.. جبال الكمائن والتطاول والترصد ومنصات القذائف وتسريبات الكذب وإشاعات البهتان الدائرة على قدم وساق على حدودنا.. العناوين الصارخة التى تخطف أبصارنا.. الجهد الثقيل الملقى على كواهلنا.. الحرص على أن تكون أعيننا وسط رءوسنا فى وضع الانتباه على مدى اليوم والساعة واللحظة وما بين طرفة العين وانتباهتها.. أن يظل سلاحنا صاحيًا.. الصبر الطويل الذى علينا قطع مشواره للنهاية.. و..عام مضى وعام على وشك بدايته وما علينا سوى ابتلاع الغصّة ورسم الابتسامة.. فى الابتسامة ثقة.. الابتسامة فى وجه أخيك صدقة، ولقد وجدت فى إخوة التواصل الاجتماعى صلات وصداقات.. ولأن الضحك عدوى، وعدوى الضحك تتجمع سحابة غبطة تمطر زخات تفاؤل تفيض نهرًا من عسل يضىء غمازات الوجه الحسن ليشدو ابن جبل الدروز: يا أبو ضحكة جنان.. اضحكها كمان.. وكمان.. وكمان..


وهذا بعض ما قد تم إيصاله ووصله وتواصله من ابتسامات وطرائف على مدى عام يسلم عامًا راية ضحك ولعب.. وجد وجد وجد وجد:

• معنى الـTeam work فى مصر.. إن الواحد يشيل الشغل والباقى يقولوله اللـه ينور!

• اتصلت بالست اللى هاتنضف الشقة لقيتها حاطة كول تون ملعون أبوك يا فقر حاوجنى للأندال فقررت أنضفها بنفسى..

• واللـه الواحد محتار فى التعامل مع الناس.. يطول باله ولا يطول لسانه؟!

• سؤال قانونى:

إذا مات الشاهدان على عقد الزواج..

ينفع الواحد ينكر إنه متجوز؟!

• لما جوزك أو خطيبك يتأخر عليكى فى الرد

مش لازم يكون بيكلم واحدة تانية..

أوقات كتير بيكون خارج معاها!

• إحنا فى الشتا لازم نعمل حملة لترك السرير الصبح ونسميها «إنت أقوى من المخدات».

• فلكيًا: النهاردة أول يوم فى شوربة العدس..

• الناس اللى بتقول لو سمحت، واتفضل، وحضرتك، وشكرًا، وبعد إذنك، وسامحنى، ومتأسف.. المفروض نجمع الناس دى ونحطها فى محمية طبيعية..

• الأرصاد الجوية بمفهوم عمال البناء: الاثنين عاصفة ترابية.. الثلاثاء عاصفة رملية.. الأربعاء عاصفة أسمنتية.. الخميس أمطار.. الجمعة الصبّة!

• هو ليه كل المغنيين غنوا لوجع القلب ومحدش غنى لوجع الضهر مع إن وجع ضهرى أقوى..

• واحد هندى حضر لجنازة مسلم:

الهندى: انتوا ليش مش إحرق قبل إدفن؟!!

المسلم: احنا ادفن بعدين ربى يحرق

• الدنيا لسه بخير..

ركبت مع سواق تاكسى محترم قبل ما يولع سيجارة سألني:

- حضرتك حتتضايق لو ولعتها؟

قلت له: آه.. قال لى: طب انزل.

• رن تليفونى وأنا فى الحمام ومراتى كانت بتصلى..

ابنى بص على التليفون وأخذ ينادى بابا بابا الملكة وردة بتتصل بك..

المدام اكتفت بقراءة الفاتحة وركعت وسلمت..

وأنا خرجت من الحمام أسأل: وردة مين؟

وقلت لابنى اللـه يلعن اللى درسك اللغة العربية مكتوب «مكالمة واردة» يا حمار..

المدام ابتسمت وجددت الوضوء

• اتنين «مونونين» واحد بيقول للتانى كان نفسى أدخل كلية الطب وأبقى أحسن مهندس فى الدنيا ويبقى عندى قضايا كتير أترافع فيها واكسبها كلها ويبقى معايا فلوس كتير..

الثانى قال له: آه والناس يقولوا يا سلام الظابط راح والظابط جه

• انت متخيل يا مان بيقولك الـIphone7 نازل بخاصية جديدة.. إنك تقول للموبايل «مراتى» يقوم يقفل التطبيقات، ويخفى الشات، ويمسح الـHistory وفوق كل ده يحط صورتها خلفية للموبايل..

• تلميذ خايب قال: ما حد ارتاح فى هذه الدنيا إلا أصحاب الكهف دقوها نومة 300 سنة، وقاموا دخلوا الجنة..

• بيقول لك اللى إيده ساقعة يبقى قلبه دافى..

- طيب واللى رجله ساقعة؟!

- يبقى ماشى حافى

• كان فيه مليون طريقة تأدب بيها نفسك بس إنت اللى اخترت إنك تتجوز!

• روعة وجمال اللغة العربية

سئل أحدهم: مَنْ أسْعدُ الناس؟ قال: من أسْعدَ الناس.

• أحلى كلمة قرأتها اليوم.. يا ماشى فوق أرض مصر حاسب وانت بتدوسها.. لو التاريخ حكى.. كنت هتوطى وتبوسها..

• رائحة غرفة النوم بعد الزواج: أول سنتين زواج: عطور، كريمات بالبارفان، ورود.. بعد سنتين زواج: بودرة أطفال، كريم تسلخات، كراوية.. بعد خمس سنوات زواج: أبوفاس، فولتارين، فاكس.

• أم كلثوم لخصت لخبطة هرمونات الستات لما قالت: «خاصمتك بينى وبين روحى وصالحتك وخاصمتك تانى» كل ده من غير ما الراجل ييجى جنبها ولا نده عليها بأيتها حاجة!

• واحدة بتقول لزوجها إنت بتابع أخبار ومسلسلات النكد ليه؟! هو أنا مقصّرة معاك!

• محفظتى بقت عاملة زى البصلة.. كل ما أفتحها عينى تدمع!

• إلى كل زوجة تمنع زوجها من الخروج مع أصدقائه.. تذكرى ان امرأة دخلت النار بسبب قطة حبستها، فما بالك وإنت يا مفترية حابسة أسد!

• القاضى للزوجة: جوزك مات من إيه؟

الزوجة: أكل جبنة مسمومة

القاضى: طيب والكدمات اللى فى وشه دى من إيه؟!

الزوجة: مكانشى راضى يبلعها..

• جوزك فين مش شايفاه؟!

- فى الجنينة أصل احنا اتخانقنا امبارح

- بس أنا ماشفتوش وأنا داخلة؟!

- آه ما هو لازم تحفرى..

• واحد شبشبه ضاع فى الجامع قال بصوت عالى: اللى خد الشبشب يرجعه بلاش أعمل زى الجمعة اللى فاتت.. كلهم خافوا ودوروا ورجعوا له الشبشب، وسألوه هو انت عملت إيه الجمعة اللى فاتت؟! قال لهم: روَّحت حافى.

• نفسى أبطل كسل

- وإيه اللى مانعك

- مكسل

• فى اللغة العربية: كلمة امرأة ليس لها جمع، وكلمة نساء ليس لها مفرد.. حتى العربى مش قادر عليكوا!!

• لو سمحت عايز أدخل الحفلة..

- فين دعوة حضرتك؟!

- يارب أدخل الحفلة

• إمبارح قِسْت حاجة عندى من عشر سنين وجت مقاسى بالضبط، انبسط قوى، صحيح هى كوفية بس خلينا إيجابيبيين يا جماعة..

• فيه ناس كويسين مفيش زيهم وفيه ناس كويس إن مفيش زيهم

• أختى الصغيرة جاية تقول لى وحياة الملايكة يا أحمد أنا مخدتش ريموت التكييف، ومرة تشوفنى بعطس تقول لى جمعا إن شاء اللـه.. حاسس إنها اعتنقت ديانة تانية!!

- يا عم أهى أحسن من اللى رجع لى من الحضانة وكانوا بياخدوا أدعية ومن ضمنها دعاء دخول الحمام، فبعدما رجع أمه سمعته وهو داخل الحمام بيقول أعوذ بك من الخبز والسبانخ..

• واحد مراته عيانة وداها للدكتور.. الدكتور قال له تأكلها فاكهة بقشرها راح جابلها تين شوكى!

• واحد بيقول لصاحبه: عاوز أعمل لمراتى مفاجأة فى عيد جوازنا العاشر..

صاحبه سأله: هتعمل إيه؟!

قال له: هوديها الصين.

صاحبه سأله: يا راجل فى عيد جوازكم العاشر هتوديها الصين أُمال فى عيد جوازكم العشرين هتعمل إيه؟!

قال له: هروح أجيبها!

• مفيش برنامج فى الموبايل يعرفنا اللى بيتصل عايز إيه؟!!

• الستات دى واللـه أغلب من الغُلب الواحدة منهم كلمة تزعلها وخمستاشر ألف ترضيها!

• بابا أنا قررت أعيش لوحدى

- ياللا.. فى داهية

- طيب أنا حاطط الشنط بتاعتكم بره ع الباب..

• مرة مكوجى طِـلع له تِعْبان فى الصحرا.. قعدوا ساعتين يبخوا على بعض..

• هل تعلم أن المخلوق الوحيد الذى يخاف منه الأسد هو «زوجته»، فإذا كنت تخاف من زوجتك فاعلم أنك أسد!

• نزار قبانى بيقول أحتاج امرأة تجعلنى أحزن.. تعالى عندنا فيه نسوان يخلوك تصلى الجمعة يوم الاثنين..

• واحدة قالت بابا بعت لى فى الواتس رسالة بيقول لى فيها: انت منورة البيت كله.. فرِحت وبعت له تسلم يا بابا رد علىّ بيقول: يا حمارة قومى طفى الأنوار..

• واحد كاتب: «الأوسبوع الجى تابدء امتحناتى لا أوريدو منكو سوا الدوعا»

محدش يدعى له خلّوه من فضلكم يعيد السنة لمصلحته!

• إيه الحاجة اللى جبتها وانت بتتجوز وتنصح غيرك ميجبهاش؟!

- العروسة..

• اليوم عيد العزوبية العالمى.. احتفلوا فى صمت فهناك متزوجون يتألمون!

• هذه هى مبادئ الشعب المصرى لو فهمتها كويس تعرف تعيش معاهم غاية فى الوئام والانسجام:

- لازم نعرف إن خير البر عاجله بس كل تأخيرة ولها خيرة..

- وأن معرفة الناس كنوز بس البعد عن الناس غنيمة..

- وإن اصرف ما فى الجيب يأتيك ما فى الغيب بس القرش الأبيض ينفع فى اليوم الأسود

- ومن الآخر بقى إدى العيش لخبازه بس باب النجار مخلّع..

- والنار ماتحرقشى مؤمن بس المؤمن دايما منصاب..

- وفى السفر سبع فوايد بس من خرج من داره اتقل مقداره..

- ويا بخت من وفق راسين فى الحلال بس امشى فى جنازة ولا تمشيش فى جوازة..

وحقولكم على الكبيرة بقى: إن كلنا ولاد تسعة بس الناس مقاااامات..

• يا دكتور بقى لى فترة مش طايق حد ممكن أعرف عندى إيه؟!

- عندك حق..

• التخطيط للزواج من الزوجة الثانية أشبه ببداية الدعوة للإسلام..

حيث يبدأ سرًا ثم يتحول إلى الجهر ثم الجهاد.. وبعدها إما النصر أو الشهادة..

• ما هى الرياضة الأكثر شعبية فى مصر؟

- الجرى ورا الستات.

• ليه مش مرتبط؟!

- لم أجد من يتحمل مستوى فرفشتى وقلشى..

- أعتبر دى حجة؟!

- لأ.. عمرة

• الزوجة بكلمة حلوة من زوجها تنسى كل زعلها منه

الزوج بكلمة حلوة من أى واحدة ينسى إنه متزوج أصلا

• من عجائب الأهرامات إنه تم بناؤها بدون سجاير وشاى للصنايعية!

• الزوجة: ما الذى بينك وبين اللـه ليرزقك بزوجة مثلى؟!

الزوج: مكنتش بصلى

• كان لازم تتجوز على الأقل مرة واحدة فى حياتك وإلا حتعيش بقية عمرك فاكر إنها حاجة حلوة..

• محدش مرتاح.

يا بختك يا محدش!

• «مادمت أمشى مستقيمًا لا يهمنى إن ظهر ظلى للناس أعوجًا» جيفارا

• «ليس الغرب عباقرة ونحن لسنا أغبياء: هم فقط يدعمون الفاشل حتى ينجح، ونحن نحارب الناجح حتى يفشل» زويل

• واحد معجب بجارته وجوزها ميت قرر يصارحها فراح خبط على بابها فتحت الباب وشافها من غير ماكياج انصدم وارتبك ومش عارف يقول إيه فقال لها: مفيش أخبار عن المرحوم؟!!

• حاول تعيش زى صباع رجلك الثالث، لا بيتخبط من رجل كرسى، ولا بتفرق معاه الجزمة ضيقة ولا لأ بايع الدنيا وشارى دماغه!

• مسئول أمريكى: أجرينا 20 مليار مكالمة تجسس على مصر 90٪ منها بتقول «جيب معاك عيش وانت راجع؟!!».

• ما هو السبب فى نعومة بشرة يديك؟!

- استخدم ربيع لغسل الصحون..

- وأين يباع ربيع دا؟!

- لا ربيع دا جوزى..

• ربنا يكفيك شر حد مقتنع إنه مبيغلطشى!!

• زوج بيصالح زوجته فيقول لها: أنا عمرى كدبت عليكى قبل كده؟!.. قالت: أيووه كتى ى يـر.. قال لها: أومال مستغربة ليه المرة دى؟!

• كلها يومين يا حاج وتخرج من المستشفى وتروح لأهلك..

- بس أنا أهلى كلهم ماتوا يا دكتور؟!

- أيوه ما أنا عارف.

• أشهر الكذبات فى مصر: «لايقين على بعض قوى».. «فولة واتقسمت نصين».. «أنا عايز بنتك بشنطة هدومها».. «احنا بنشترى راجل».. «حماتك بتحبك».. «خللى يا باشا».. «جيب السبع مايخلاش».. «خمس دقايق وأكون عندك».. «كنت لسه هكلمك».. «كنت بصلى العشا».. «الشبكة واقعة».. «اتعب وانت صغير ترتاح لما تكبر».. «زى الفل»..

• خليجى دخل عند حلاق مصرى خرج من عنده أقرع.. ليه؟!.. علشان كل ما الحلاق يقول له كويس كده يرد عليه الخليجى بقوله: واللـه ما قصّرت..

• حِكمة اليوم: اصرف ما فى الجيب واشحت تانى يوم مش عيب!

• لو لقيت نفسـك مـش عــارف ترضـى جـميع الأطـراف.. زعـلهم

كلهم!!

• كنت فين؟

- كنت قاعد مع نفسى شوية

- مش قلت لك قبل كده متقعدش مع الأشكال الزبالة دى..

• بنت بتسأل أمها حتطلبوا إيه من العريس اللى حيتقدم لى؟

الأم: نطلب منه يسامحنا دنيا وآخرة.

• كلوا موز كتير لأنه طلع بيحسن الحالة النفسية.. أنا فعلا عمرى ما شفت قرد متضايق!

• فيه ناس تخليك تنسى الدنيا لما تتعامل معاهم، وناس تخليك تنسى تربيتك علشان تعرف تتعامل معاهم!

• الواحد كل ما يبقى مبسوط تحس إن الدنيا بتقول وعندك واحد مبسوط وزعله!

• ماتعيطشى على اللى فات استنى اللى جاى وعيّط على كل حاجة مرة واحدة!

• مرة دكتور بنطلونه اتقطع خيطه وبعد أسبوع لقاه كويس فك الخياطة!

• نطالب التربية والتعليم بإغلاق المدارس لأنها بتعطل أولادنا عن الدروس الخصوصية!

• الواحد لما بيقع تحت إيده برفان مش بتاعه بيتعامل معاه على إنه طفاية حريق!

• أنا هطلب دليفرى أطلب لك معايا؟

- يابنى الأكل اللى من بره مليان ميكروبات وهيموتك.

- أنا اللى هدفع

- اطلب لى معاك الأعمار بيد اللـه

• من ساعة ما عرفت إن الدنيا مدرسة وأنا بدور ع السور..

• هو الحب قبل الجواز ولاّ بعده؟!

- هو قالك فين؟

• خمس طرق تجعل الرجل مبسوط فى حياته:

الأولى: أن يجد امرأة تجعله يضحك

الثانية: أن يجد امرأة تشاركه كل شىء

الثالثة: أن يجد امرأة تحبه حب حقيقى

الرابعة: أن يجد امرأة تعطيه الاهتمام الكافى

وأخيرًا: إنه مايخليش الأربعة يعرفوا بعض.

• واحدة تخينة أوى مسكت حرامى راحت قاعدة عليه وقالت لابنها روح نادى أبوك من على القهوة، الواد قالها مش لاقى الشبشب.. الحرامى راح مصرخ وقال له يخرب بيت أمك روح حافى..

• مين دى؟!

- دى موظفة عندى فى الشغل.

- وبتدلع عليك ليه كده؟

- عايزة تترقى يا سيدى

- وانت طبعًا هترقيها؟!

- لأ طبعا ده أنا مرقيها خمس مرات الأسبوع اللى فات، مش ميغة هى.

• كلمة «الإيد» فى اللـهجة العامية ملهاش مثيل:

- إيده بيضا: صاحب فضل ومعروف

إيده ماسكة: بخيل

إيده طايلة: يقدر يعمل حاجات مهولة

إيده واصلة: واسطة قوية

إيده طويلة: يؤذى من حوله

إيده خفيفة: حرامى

إيده مخرومة: مُسرف ومبذر

إيد ورا وإيد قدام: مفلس

إيدى على كتفك: أعتمد عليك

ماسكه من إيده اللى بتوجعه: ماسك عليه ذلّة

إيده طرشة: كفه يترك عاهة مستديمة

إيد مرزبة: وكأنها هراوة

إيدك أبوسها: تسلم يا غالى

• الواحد يبقى لسه صاحى من النوم يلاقى البيت كله اندهش: إيه ده إنت صحيت؟!..لأ واللـه طالع فاصل بين الحلمين!

• لما تلاقى واحدة حاضنة دركسيون العربية زى مخرطة الملوخية ماتمشيش جنبها ولا وراها ولا قدامها ولا تعديها.. إركن!!

• عايز حد يحبك بجد. مايستناش لك على غلطة. مايفهمكش غلط. ما يخونكش. يحزن لحزنك ويفرح لفرحك.. اشترى كلب!

• نفسى أوصل لمرحلة «إنت الفلوس غيرتك»

• تشربى إيه؟

- تشوكليت فرابتشينو

- لا واللـه لازم تشربى حاجة

• أنا داخل على حالة اكتئاب

- قشطة.. أول ما توصل كلمنى أنا جوا

• تعرف إن مـمارسـة الرياضـة بانتظـام تعمـل عـلى تحسـين المزاج

والحالة النفسية..

- لَف ورق العنب بيعمل أكتر من كده ومن غير نهجان.

• إيه يابو يوسف.. عامل إيه؟

- الحمد للـه.

- أيوه يعنى إيه أخبارك؟

- الحمد للـه.

- والدنيا عاملة معاك إيه؟

- واللـه الحمد للـه

- يا عم الحمد للـه على كل شىء، بس احكى لى فيك إيه؟!

- واللـه ماخبيش عليك مشاكل مادية كالعادة، ومشاكل فى الشغل، والعيشة بقت صعبة والطلبات فاتحة بقها غير مرض الوالدة وقعدة الواد من غير شغل، وأخبار الكفر اللى مش ولابد و...

- يا عم قول الحمد للـه

- ما أنا يا ابن... بقى لى ربع ساعة بقولك الحمد للـه وأنت اللى مش عاجبك!!

• رئيس وزراء أثناء تفقده أحوال الدولة مع حشد من وزرائه قام بزيارة لحضانة حكومية.. سأل كم تكلفة الوجبة اليومية؟

قال محاسب الدار: 200 جنيه للصغير

قال: كتير 100 كفاية الميزانية لا تحتمل

وبعدها زاروا السجن، وسأل كم تكلفة الطعام اليومى

قال المحاسب: 400 جنيه للفرد

قال لا قليل ارفعوها إلى 600.

واحد من الوزراء استغرب وسأله أين المنطق؟ بتاخد من حصة العيال وبتعطى للمساجين؟!

قال له: يعنى تفتكر بعد ما نخرج من الوزارة هيودونا الحضانة؟!

• عملت للحزن بلوك قام عمل لى أكونت جديد!

• لو كان الجواز مش جريمة ما كانوش طلبوا له اتنين شهود!

• الواحد كل ما يحاول يفهم الدنيا يغيروا المنهج!

• مش كل من طبطب عليك حاسس بهمومك مش يمكن إيده مبلولة وبيمسحها فى هدومك!

• أنا مش زعلان علشان بدور على ريموت التليفزيون وهو فى إيدى.. لا أنا زعلان بس لأنى وطيت الصوت علشان أدوّر بتركيز!

• معلشى بعتلك شتيمة غلط

- مافيش حاجة وصلت

- طب استنى هبعتهالك تانى.

• مبحبش الفسيخ بس اتعلمت منه حِكمة، إن هييجى يوم للمعفن ويبقى له قيمة.

• حاول تضحك لأى حد ماشى فى الشارع ممكن بسبب ضحكتك ينسى مشاكله ويقول مين المتخلف ده..

• عامل إيه مع خطيبتك؟

- مبقتش خطيبتى

- أحسن برضه دى وحشة ومش كويسة

- بقت مراتى

- بس جدعة وبنت ناس أوى

• مرة واحد مصرى راكب جنب واحد أجنبى فى الطيارة.. الأجنبى قام يدخل الحمام المصرى أكل وجبته.. رجع الأجنبى وبيسأله عليها؟! قال له واللـه العظيم بحسبك نزلت!

• بقولك إيه يسطا..

- قول يسطا

- عايزك تشهد معايا زور إن واحد أخد منى 100 ألف جنيه وليك نصهم.

- هو ابن الكلب دا مجبشى الفلوس لغاية دلوقت؟!

• حياتى بقت يا إما فى الشغل أو تعبان من الشغل أو نايم علشان لسه جاى من الشغل أو نايم علشان عندى بكرة شغل!

• المصرى لو قطعت عنده الكهربا يروح يبص من الشباك على جاره لو لقاها قاطعة يرتاح نفسيًا!

• المأذون مش فالح بس غير ساعة الطلاق يفضل يقول راجعوا نفسكم.. مبتقولش ليه كده وانت بتجوزهم يا خويا؟!

• أصعب إحساس فى الشتاء إنك تشغل فيلم وتنام ع الكنبة وتتغطى بالبطانية وفى عبك سلطانية فشار وخلاص القعدة فل الفُل تيجى تدور ع الريموت تلاقيه فوق التليفزيون!

• لما حد يقول لك اسألك سؤال بس تجاوب بصراحة.. السؤال ده أصلا بيخلينى أفكر فى الكدبة قبل ما يقول السؤال!

• واحد انخطفت زوجته وطلب الخاطف فدية وبعت له صباعها مقطوع للتهديد.. رد عليه زوجها: يمكن الصباع يكون لواحدة تانية ابعتلى راسها عشان أتأكد!

• واحدة بتعاتب جوزها: شايف أبو محمد من حُبه لمراته لما ماتت بنى لها جامع باسمها.. رد عليها: أنا شارى الأرض من زمان بس التأخير من عندك.

• واحد تعرف على واحدة على الفيسبوك وسألها: لون عيونك؟ قالت: أزرق، قالها: ومن غير عدسات: عسلى.. ومن غير كدب: أسود.. ومن غير حلفان: حولة.. وبالحلفان: أنا محمود!

• شلة نمل لبنانى ميتين من الضحك.. لييش؟! ماسكين صرصور صغير وكل شوّى يسكّرون خشمه ويسألونه شِسمك؟ يقول لهم صنصون.. يموتوا من الضحك!!

• بتسألها من وين الجمال بتقولك من اللـه وهى عاملة عمليات أكتر من حزب اللـه!

• الشعب المصرى الوحيد اللى بيستخدم «البؤ» كوحدة قياس: بؤ شاى، بؤ مية، بؤ عصير.. لكن ميعرفشى يقول بؤين حلوين فى غيابك!

• خدت إيه النهاردة فى المدرسة؟.. كان عندنا امتحان مفاجئ

- وعملت إيه؟.. اتفاجئت.

• لا تبح بأسرارك سوى لجدتك.. سمعها ضعيف وتنسى بسرعة وآخر القعدة بتسألك: ابن مين إنت؟!

• على رأى المثل، طالما البرص ما شفش الشبشب، هيفضل فاكر نفسه تمساح!

• شيخ بيقول للمنوفى: يا بنى الصم والبكم محتاجين تبرع..

رد المنوفى: اسمعها منهم لا مؤاخذة!

• عسكرى اتصل برئيسه فى القسم وقال له: حضرتك حصلت جريمة قتل، ست قتلت جوزها بسكينة فى قلبه، والسبب إنه دخل البيت بالجزمة وهى بتمسح البلاط قبل ما ينشف.

الضابط قاله: المهم قبضتوا على الست؟

العسكرى: لسه سعادتك مستنيين البلاط ينشف.

• حد يلف لى باقى السنة Take Away مش قادرة أكملها!


لمزيد من مقالات سـناء البيـسى

رابط دائم: