شقيق ياسمين عبدالعزيز يهاجمها بكلمات جارحة بسبب شائعات ارتباطها بأحد الفنانين |صور

وجه الفنان وائل عبدالعزيز، رسالة غامضة لشقيقته الفنانة ياسمين عبدالعزيز، بعد انتشار شائعات حول ارتباطها بأحد الفنانين.

وقال عبر صفحته الرسمية على موقع التواصل الاجتماعى "فيسبوك": "بصي يا ياسمين يا عبدالعزيز يا أختي: أنا معاكي وفي ضهرك من وأنتي صغيره شيلت مشاكل كتير بسببك من وأنتي عيلة صغيرة بداية من مشاكلك مع الشاعر وبراده وأنتي عارفه أن أنا أتاذيت فيها ازاي وقضية الشغالات مؤخرا غير قضية الضرب الي كانت بينك وبين بنت هشام سليم الممثلة إلي لبستيها التورتة في وشها.. ووقفت جمبك بكل ما املك من قوه أدافع عنك في كل موقف صعب مر عليكي ونسيت حياتي ونفسي عشانك وبقي كل همي انا ووالدتك انك تكبري وتبقي نجمة في مجالك.. سيبنالك اختياراتك كلها لنفسك ووفقنالك علي معظم قراراتك وكنت الوحيد الي ساندتك ووقفت جنبك في طلاقك.. لكن هنهرتل وتروحي تعرفي واحد اصغر منك ب ١٠ سنين لا من سنك وتتصوري صور مالهاش اَي لازمة علي حساب سمعتك وسمعتنا لا ومحدش هيسمح.. من امتي واحنا بنعمل أعياد ميلاد وتنزل علي السوشيال ميديا.. من امتي الناس بتجيب في سيرتنا؟.. ونقعد نتعاكس علي السوشيال ميديا".

وتابع: "ومع ذلك حياتك وأنتي حرة فيها.. أنا هتكلم علي الشق الي يخصني.. انتي مقاطعه كل العيلة عشان تعملي اللي علي مزاجك.. احنا دلوقتي عايزين نفهم العلاقة دي ايه و رايحة علي فين.. أما بالنسبة للأخ الي ماشي وراكي في كل حتة وشايفك البيضه الدهب الي هتفقسله كل يوم.. احب أقولك يا راجل لما تيجي تدخل بيت تدخله من بابه يا راجل!.. وتقعد مع رجاله البيت.. دي الأصول وده الاحترام.. وطبعا لأنك عارف انك مرفوض رافضا باتا فا عمرك ما هتعمل ده ومعندكش غير طريق الشمال الي انت سالكه من سنين مع بنات الناس.. أنا من رأي كفاية عليك البطولة الي أخدتها والعربية المرسيدس الهدية.. وتركز في شغلك وتسيبنا في حالنا لان طول عمرنا في حالنا ومحدش سامع عننا حاجه وملوش لازمة جو الصور والمعاكسات ده وأنا مبخفش من تهديد حد".