تعرضت الفنانة مي عز الدين لأزمة مع جمهورها ومحبيها ، نتيجة عرض وإعادة مسلسلها الجديد "وعد" في أوقات غير مناسبة، وهو ما تسبب في عدم تمكن جمهورها من مشاهدة المسلسل.
وطالبت مي إدارة قنوات "Mbc" مصر بزيادة مرات إعادة مسلسلها وعرضه على قناة "Mbc مصر" لأنه يعرض فقط على قناة "Mbc مصر 2" رغم أنه المسلسل الوحيد الذي أنتجته شركة تابعة لهم.
ولكن جاءت هذه الطلبات دون جدوى، مما جعل مى وهى الفنانة شديدة التفاعل على وسائل التواصل الاجتماعى، تكتب تدوينة طويلة على حسابها الشخصى بموقع التواصل الاجتماعي "فيسبوك" ليستوعب جمهورها المستاء من توقيت عرض مسلسلها على قناة واحدة في موعد واحد.
وقالت مى في تدوينتها: "طيب أنا قضيت اليومين اللي فاتو بحاول أطالب إدارة قنوات Mbc مصر بزيادة إعادات المسلسل وعرضه علي قناة Mbc مصر كمان لأنه بيتعرض علي Mbc مصر 2 فقط ودي ناس كتير مكانتش تعرفها ولا منزلاها وهو المسلسل الوحيد اللي كمان من إنتاج شركة تابعة ليهم ومع ذلك مش راضيين يخلوه بيتعرض على القناتين بتوع Mbc مصر وسايبينه علي Mbc مصر 2 بس".
وتابعت قائلة: "وفي الآخر الرسالة الوحيدة اللي وصلتني إن ده مقصود علشان دي الفرصة إن القناة تتعرف!!! يعني أنا كده مطلوب مني أقوم قناة لوحدي!!! تمام وأنا بقول لـmbc قبلت المسئولية وبإذن الله ربنا يكرم والقناة والمسلسل يتشافو والحمدلله فيه علامات باينة من كم الإعلانات اللي جه من بعد أول حلقة للمسلسل وغيره وأنا هعتبره امتحانا ليا يعرفني قدري عند الناس وهل فعلا بيحبو مسلسلاتي أو لا ونسبة الجماهيرية اللي وصلتها إيه مع إني مهما كان ليا جمهور أكيد كنت أتمني إني إتشاف من الناس اللي مش من جمهوري لأن ساعات بتكون كا مشاهد ملكش في ممثل لكن لو قابلت حلقة لمسلسله بالصدفه وعجبتك بتقرر تتابعه وده في الآخر بيبقي خلاني كسبت مشاهد جديد بقي بيحب يتفرج على أعمالي وده طبعا مش هيحصل السنة دي لأن مفيش حد بيبقي معدي وبيشوف القناة دي بالصدفة الناس لسه أصلا بتتعرف على طريقها من خلالنا وبينزلوها".
وختمت مي حديثها قائلة: "قدر الله وما شاء فعل وبالتالي عندي طلبان أولا بطلب من جمهوري وروابط الفانز بتاعتي تساعدني في نشر تردد القناه لكل الناس اللي مش عارفة تجيبها وبطلب من صحافتنا تشهد أنا بدأت رمضان بقناة كم الناس اللي عارفها قد إيه وصفحتها حتي علي الفيسبوك فيها كام وبعد رمضان تقولولي بأمانة هل قدرت فعلا في ظل الظروف دي أنجح ولا لأ.. ومتابعة نسبة مشاهدة القناة علي آخر رمضان هتكون وصلت لإيه ومشاهدة المسلسل على موقع شاهد دوت نت وصلت لإيه لأنه المكان الوحيد اللي الناس تقدر تشوف الحلقة فيه لو موصلوش للقناة. شهادة الصحافة والجمهور ساعتها تعويض يكفيني".