"لو ضِحْكِت".. قصيدة لـ"محمد عمر السنوطي"

23-9-2019 | 14:11

محمد عمر السنوطي

 

ولو ضِحكت .. بيطلَع فجر 

 وتظهَر شمس في عينيها
يسافر من عينيها الضي 
ويملا الدنيا حواليها 
ولو ضِحكت.. جناين ورد
تنوَّر زاهية في خدودها
وجنة ف وشها .. تطرَح 
تخلِّي الكُل يعبُدها
ولو ضحكت.. يهيم رسام
ويبدِع أحلى ألوانهُ
مشاعر تِلهِم الفنان
ويعزف أصفى ألحانهُ
ولو ضحكت .. يتوه الوقت
وماضي من زمان يرجَع 
يحِس الصخر بالضحكة
يحِّن لسحرها و يسمَع
ولو ضِحْكِت و شافها حزين
بينسى أوام .. أساه و هَمُّهُ
ويسمعها اللي  حلمه بعيد
يشوف في الضحكة دي حِلمهُ
ولو ضحكت كتير يعشَق
ويقفوا يدوبوا قُدَّامها 
ومهما في الهوى اختلفوا..
هيتفقوا على غرامها
ولو ضحكت  يغني الكون 
و تنسى الدنيا أوجاعها
وتنزِل م السما السابعة 
ملايكة.. تحِّب تسمعها.

الأكثر قراءة