ثقافة وفنون

بص قدامك يا دفعة

22-10-2017 | 13:07

لوحة للفنان فريد فاضل

سعيد شحاته‎

بص قدامك يا دفعة (*)

....
هو دا لون مصر جوه وشوش ولادها
ضحكة الحب اللي طالعه بأريَحيّه
كلمة النصر اللي وقت الخوف وتدها
طلقة العِزّه ف ماسورة البندقية
......

بصّ قدّامك يا دفعه الفجر طالع
دوس على رمل الصحاري وهوّ والع
وارسم النيل قلعه والأحلام طوالع
مصر بإيديك بكره منصانه وعفيّه
......

بصّ قدّامك وغنّي وقول بلادي
اسمحيلي ابدأ حياتي من الليلادي
واكتبي ويايا ف شهادة ميلادي
عسكري وشايلك ذخيره ومدفعيه
......

النهار الجاي على ترابك أغاني
واحنا حرّاس الأمل مش حدّ تاني
تؤمرينا نلبّي ونِهمّ ف ثواني
تصبحي الآمر ونصبح مأموريه
......

جايه بكره يا مصر ورد وتوت ومدنه
جايه بكره يا مصر أحلامنا وسندنا
جايه قبل ما نتولد وامّا اتولدنا
بينا وبغيرنا وأكيد يا مصر جايه
بكره نتباهي ونقف ونقول بلدنا
....

قبلة اللي اتمرّدوا ومأوى اللي شافوا
قلب كل اللي افتروا وكلّ اللي خافوا
كلّ واحد فينا شايلك فوق كتافه
كلّ ضحكة حبّ عدّتنا وعتادنا
...

جايه بكره يا مصر بإيدينا المتينه
رايه مزروعه ف تراب قلبك وفينا
بينا دايره ولسّه هتدور السفينه
والمواني كتيره.. يطلع ألف مينه
بس مرساكي الأكيد مينة فؤادنا
...

يا وطن مرسوم على الدّبْشك محبّه
العساكر حافظه روحك نبّه نبّه
والسلام لاخضر هنا على كلّ تبّه
شابّه طول عمرك وغيرك نصّ لبّه
والجميع عارف إذا قلنا وأردنا
....

جايه.. مهما الكائنات قالوا.. احنا قلنا
جُولنا في رحاب قلبك الطاهر وصُولنا
وابتدينا نعظمّك لحظة وصولنا
يستلمنا شاويشنا ويعلّمنا صولنا
وانتي طير واقف على أطراف نُصولنا
جينا يا أرض التاريخ.. جينا ف معادنا
وانتي جايه ف وقتك المحتوم معانا
جايه واحنا يا مصر صاينين الأمانه
قلبنا بيغني غنوة شوق ودانه
صف واحد... "صَفوْ نشربُ إن وردنا"
....

بصّ قدّامك يا دفعه يا صوت وصوره
يا على ملفوف على أجدعها قوره
كلمتك برصاصه تطلع م الماسوره
تنهي ترتيبة عدو وتحسم قضيّه
......

بص قدّامك عشان تكشف حدودي
الخريطه صريحه من أيام جدودي
والعدو المحتلّ صهيوني ويهودي
واحنا مهما بعدنا... مصر النصر جايه
......

هو دا لون مصر جوه وشوش ولادها
ضحكة الحب اللي طالعه بأريَحيّه
كلمة النصر اللي وقت الخوف وتدها
طلقة العِزّه ف ماسورة البندقيه

----

(*) بص قدامك يا دفعة (إلى أخي الدفعة حسام حامد)

مواقيت الصلاة

اسعار العملات

درجات الحرارة