Close ad

في شارع الأرواح

16-3-2017 | 10:56756

في شارع الأرواح

16-3-2017 | 10:56756
16-3-2017 | 10:56756طباعة

باحبّ الحياه اللي عايشاكي جدًّا
وباعشق كلامك في وقت السكوت
ولما اكتبك في القصايد باحاول
أكون قادر أصرخ واقولِك بصوت
واحاول إذا أرغموني.. انّي احبّك
وازوّق بروحك جميع البيوت
واحاول إذا أرغموني.. انّي اضمّك
ولو هاحضنّك جته هامده ف تابوت
هاحاول إذا أرغموني... انّي اعيشك

ما انا نفسي أعيشك أساسًا واموت

......................

قلبي ف إيديكي
وروحي زي الطير بترقص في البَنَاني الضيّقه
يا معلّماني أرمح في عزّ البرد وأتهجى الشقا
أنا وانتي وِردين صُبح عاشقين ربّنا
أنا وانتي فرح ونور وضحك وتريقه

وعشان كدا نفسي أسألك قبل اللقا

قبل الملايكه ما تبتدي تطالبك

قلبك قصيده قُصيّره
واللا القصايد كلّها قلبك؟

قلبي ف إيديكي

وروحي زيّ الطير وروحك حَبّ

بردان وحضنك حضن أمّ وأبّ

سوّاح وخدّك نبع وعيونك مصبّ

عطشان وشارب من أيادي الربّ غنّيوه

تايه معاكي يا بنت يا حليوه ف حواري الهيش

عدّيت عليكي وقلبي متكتّف

وناديت بعزمي وبرضه ما سمعتيش

...............................

ما سلّمتيش على روحي النهارده إزّاي
وإيه خلاكي تمشي ف شارع الأرواح
ولا تعدّيش
أنا من بدري مستنظر
شفايفك احلّي بيها الشاي
وبوستي بروحك الفناجين وما شربتيش
لذلك كلّه متأجل
على شرف الفطار الجاي
ولو مرّيتي من غير ضحكتي اللي معاكي
ما تمرّيش

ولو قلبي الضعيف حاول يبوسك

برضه ما تبوسينيش

اقرأ ايضا:

في شارع الأرواح

أضف تعليق